Forest hremna kaltlangpui dawn

Nottingham Forest chuan Premier League profit & sustainability rules (PSR) an bawhchhiat avanga point li an paihsak chu khinglet mah se, an khinletna hi hnawlsak an ni a, relegate thei dinhmuna ding mek Forest tan chanchin lawmawm lo tawpkhawk a tling.

Premier League danah chuan club-ten season thum chhungin pound maktaduai 105 aia tam an hloh thiang lo a, season khatah £35mtd chiah an hloh thei tihna a ni. Forest bik hi an hloh theih zat hi £61mtd-ah tihsak an ni a, hei hi a chhan chu he dan hman mek enchhin a nih lai kum hnih chhung hi Championship lama an la khelh vang a ni.

Forest hi season hmasa khan an sum hman theih chin aia tam hmangah puh an ni a, hei vang hian hrem an ni. Forest hian pound maktaduai 61 chiah hloh thei an nih laiin, an hloh theih zat aia tam an hlohna zat hi £34.5mtd a tling a, hrem an ni ta - khinglet mah se, thiam an chang ta chuang lo!

Nottingham thubuai ngaihtuahtu mi pathum chuan inlungrual takin Forest khinletna hi thutling loa an ngaih thu an sawi. Forest hi Premier League table-ah 17-na an ni mek a, relegation zone-a awm chin Luton Town aiin point li chauhin an sang.

Premier League-ah match hnih khelh tur a la awm a, Forest hian Chelsea leh Burnley an la hmachhawn dawn - match hnih aṭang hian point li an hlawhchhuah chuan midang result-a innghat loin an him chiang dawn a ni.