Inphatsanna ang mai a ni - Thomas Tuchel

Bayern boss Thomas Tuchel-a'n nomawi nen ngeia German club mangṭha a duh a, mahse, kut ruakin Allianz Arena a chhuahsan dawn ta thung - final an luh lohna hi tlemtê chauh a ni a, De Ligt-a goal khung an pawm loh chu puh theih tak a ni bawk.

Tuchel chuan, "De Ligt goal pawm loh kha chu thutlukna chhe tawpkhawk a ni a, assistant referee leh referee khan an tisual chiang hle a ni. Miin min phatsan ang maiah hian ka inngai a ni.

"Assistant referee khan ngaihdam a dil a, mahse, awmzia a awm tawh lo. Referee khan engkim a hmu a, kan tan chuan pai dam a harsa a, mahse, a thleng tawh miau si a ni," a ti a, a lawm lo hle.

Bayern-in tlarhnung aṭangin fullback Noussair Mazraoui zawnah ball an thlawh lut a, hetihlai hian assistant referee chuan offside a phar. Hei vang hian Real defender-te an chawl a, hemi karah hian De Ligt chuan goal a khung.

Replay en chuan Mazraoui hi a offside lo niin a lang. Mahse, linesman-in offside a phar avanga Real tlarhnungte an din avang khan video assistant referee tan inrawlh a rem tawh lo a, goal-ah pawm a ni ta lo.

De Ligt chuan, "Football-ah dan kan siam a, kan dan ang chuan offside chiang tak a nih loh chuan linesman-in a phar tur a ni lo. Hei chu tihsual lian tak a ni," a ti a, assistant referee chuan a tihsual a nih thu a hnenah a sawi thu a sawi bawk.