Kimmich pawh a dive kha - Ancelotti

Matthijs de Ligt goal khung pawm loh avangin Bayern Munich an lawm lo a, mahse, German club Coach hlui leh Real Madrid boss ni bawk Carlo Ancelotti chuan a team hluite thil sawiselna chu na takin a chhanglet.

Italian coach chuan, "Kha offside kha Bayern-in an sawisel nasa viau a nih chuan Nacho goal khung an pawm loh kha kan sawisel ve mai dawn em ni? A chhan chu Kimmich kha a tlu der tlat alawm," a ti a, Bayern chu anmahni chauh inenah a puh.

Ancelotti chuan sawi zawmin, "Kha offside kha sawi buai vak tur a awm lo a, thil sawifiah awlsam tak a ni. Offside chu a ni kher lo mai thei a, mahse, goal a luh hma khan referee-in ham rik a ham a, ka player-te an khel tawh lo," a ti.

Kum 64 mi Ancelotti hian Real Madrid hi tun season-ah league nomawi a chawipui tawh a, 2021-22 season khan a lo champion pui tawh bawk. Champions League-ah pawh vawi hnih a champion pui tawh a, a vawi thum nana champion pui thei dinhmunah a ding mek.

Champions League final hi June 1, Inrinni zanah khelh a ni dawn a, Borussia Dortmund leh Real Madrid ten champion nomawi an inchuh ang.