Lammualah CYMA Cricket Semifinal : Durtlang Vs Chanmari; Ramhlun Venglai Vs Luangmual

CYMA leh Cricket Association of Mizoram buatsaih 12th Inter Branch Cricket Tournament semifinal chu vawiin hian Lammualah khelh a ni dawn. Zing dar 8:30-ah Durtlang leh Chanmari ten semifnal hmasa zawk an khel ang a, chhun dar 12:00-ah Ramhlun Venglai leh Luangmual te an inkhel ang.

Record nei ṭha

Semifinalist pali zingah Luangmual chauh hi final la lut lo an ni a, team dang pathum hi chu CYMA Cricket-a sulhnu nei ṭha tak vek an ni. Ramhlun Venglai hi inelna hnuhnung pathum a zawna champion thei an nih bakah inelna vawi 11 awm tawh aṭangin vawi riat final an lut thei a, vawi nga an champion tawh bawk.

Chanmari hian vawi nga final lut tawhin vawi li an champion tawh a, Durtlang hi vawi khat chiah la champion mah se vawi nga final an lut tawh a, inelna hnuhnung pathumah final an lut vek. Durtlang hian kum 2007 hnua a vawi khat nan champion leh ngei an tum ang.

En châkawm chu

Lammuala CYMA Cricket khelh hnuhnung bera champion chu Chanmari an ni a, amaherawhchu Chanmari hian player thar chhuak ṭha an nei meuh lo.

Chanmari hian coach ṭha an nei thung a, coach Lalruatsanga (BCCI level 2) leh Lalhmingliana (BCCI level 1) te an la khel thei a, an champion ṭuma opener Zothantluanga leh Mizoram aiawh pawha feh chhuak fo Lalfakzuala Renthlei te hi an innghahna tur an ni thei bawk ang.

Durtlang erawh 2007 an champion ṭuma captain Vanlalruata awm tawh lo mah se player ṭha an la ngah hle. Ruata hi Indian Cricketers Association-ah CAM representative a nih avangin competitive match a khelh a rem lo a, professional cricket chawlhsan tawh mah se tualchhung cricket erawh a la chawlhsan lo tih hriat a ṭha.

Marty Lalrinhlua, Lalhruaizela, Lalhriatrenga, H. Zothanchhunga leh Zothanzuala te hi an khelh ṭhat ṭumah chuan team chakpui thei vek an ni a, Mizoram kawr pawh an ha fo tawh. A bik takin Hruaizela hi en bik tur a ni thei ang.

RVL an ṭha

Luangmualin G. Lalbiakvela an nei a, player dang langsar an nei tawh lo. Team ṭha bera ngaih Ramhlun Venglai hneh tur chuan Luangmualin an khelh ṭhat ber ṭum an tawn a ngai a, RVL khelh chhiat ṭum a nih a ṭul bawk ang.

Ramhlun Venglai captain Joseph Lalthankhuma'n quaterfinal-ah ball 58 lekah 156 runs a siam a, a theihna sanzia a lang. Lammual ground hi cricket khelh nan a lian lo a, artificial turf a nih bawk avangin ṭum dang aia run an siam tam pawhin a mak lo ang.

Joseph-a bakah Vanlalrinzuala leh Lalrinfela Zadeng ten tualchhung inelnaah tawnhriat an ngah a, player dang zawng pawh hi veng dangah chuan awm se star player ṭhuau tur an ni. RVL hian cricket an tui chilh a, veng anga cricket tham ber tia sawi theih an ni. Semifinal a nih bakah Lammual a nih dawn avangin ṭawiawmtu pawh an nei ṭha fal ang.