Vawiinah MPL khel tur a hriat dawn

MPL11 Qualifier chu vawiin hian RG Stadium-ah khelh chhunzawm a ni dawn a, tualchhung football tuichilh tak tak chinin an ngaihven ang. Aizawl DFA First Division champion FC Bethlehemin point li an hmu tawh a, vawiin chawhnu dar 1:30-ah Lawngtlai club MLS FC nen an inhmachhawn dawn. Chawhma dar 11:00-ah Lunglei club SYS FC leh Bethlehem Vengthlang FC te an inkhel bawk ang.

Inelnaah hian team pali an tel a, a sang berin MPL an khel dawn. Pahnihnain MPL Playoff an khel ang a, MPL10-a pasarihna Project Veng FC nen double legged playoff an khel ang. Tun dinhmunah FC Bethlehem, SYS FC leh MLS FC ten pakhatna dinhmun an la luah thei vek a, Bethlehem Vengthlang tan MPL Playoff khelh theihna kawng a inhawng bawk.

Fixtures awm dan a fuh a, inkhel hmasa tur zawk tak an khel hmasa. Beiseina sang tak nei chungin Bethlehem VT leh SYS FC te an inkhel ang. BVT hian playoff khel pha turin chak ngei an mamawh a, chuvangin SYS FC lakah attacking football an khelh a ṭul dawn. Chutihrualin match hniha goal hnih khung thei ve ve, Lalmuankima kaihhruai SYS FC ten match thumnaah pawh goal khung chhunzawm an tum ang.

SYS FC hi rawlthar ṭha rual awm khawmna an ni a, Lungleiah hmunpui neiin Lallianzuala Chhangte-in tun dinhmun a thlen theih nana coach pawimawh Muankima hnuaia training an ni. MPL Qualifier hi kum bithliah a nih loh avangin an kum naupanna a lang deuh a, chutihrualin mumal taka training ṭhin an nih avangin MPL khelh beiseina sang tak nei an ni. SYS FC hian BVT hi an hneh thei a nih chuan a chhe berah playoff an khel ang.

Chawhnu lama inkhel tur erawh MPL Qualifier a ni ringawt lo, MFA Cup final rematch a ni tel bawk. April 13, Inrinni khan CYLA Ground-ah MFA Cup final khelh a ni a, mualneitu Lawngtlai club MLS FC chuan FC Bethlehem chu 2-1 in an hneh. Coach Vanlalpeka kaihhruai MLS hian First Division champion an hneh theih avangin MPL khelh beiseina sang tak an nei a, amaherawhchu match hmasa bera SYS FC an hneh loh an tuar - midang result-ah an innghat tawh.

MLS hian Bethlehem hi an hneh hrim hrim a nih chuan playoff an khel dawn a, chutihrualin coach Lalhriatpuia Sailo kaihhruai FC Bethlehem hian phuba lak an tum dawn. Lawngtlai club aiin FC Bethlehemin RG Stadium an hrechiang a, MPL khelh ngei tuma player an inlak belh bawk avangin chak tura rin hlawh zawk an ni.