India tan Lalrina leh Ṭhazuala an ko

Basketball Federation of India chuan West Asia Super League inbuatsaih nan national camp a awm tur player a ko khawm a, an zingah Mizo pahnih Lalrina Renthlei leh Vanlalṭhazuala te an tel.

National camp hi May 11, Inrinni aṭangin National Sports Centre, Chennai-ah neih tur a ni dawn a, player an kohte hian training an nei ho phawt ang a, chumi hnuah final squad an la puang leh dawn a ni.

Mizo player ṭha pahnih Lalrina Renthlei leh Ṭhazuala te hi tualchhung basketball inelna Mizoram Super League lama hming chher tawh an ni a, ram pawn lamah pawh hriat an hlawh viau bawk.

Mission Veng Vikings leh Zarkawt BCA tana MSL nomawi chawi tawh Lalrina hian India camp a zawm thei ngei dawn em tih erawh a la chiang lo. May 12, Pathianni aṭang hian Red Bull Half Court National Fianls a khel hmasa dawn.

Lalrina chuan, "Inelna hi Chandigarh-ah neih tur a ni ta, Diphu hmingin ka inlan ang, team pariat tel tur kan ni a, hnam dang hlir ka ṭanpui dawn," tiin Vanglaini a hrilh, a champion team chu khawvel huap inelna hmachhawn turin New York-ah an kal leh ang.

Khatla TBL star Ṭhazuala erawhin India camp a zawm dawn tih sawiin, "Inrinni hian India camp zawm turin ka kal ang," tiin Vanglaini a hrilh a, tun hmain Ṭhazuala hi India camp-ah hian vawi khat chu koh a lo ni tawh bawk.