Veteran football-ah Lengpui an champion

GIG Motors Veteran Football Tournament 2024-ah Lengpui Veteran chuan Rohmingthanga goal hnih hmanga Ward No. IX 2-1 a hnehin an champion. Tualchhung football-a Lengpui rawn larpuitu Rohmingthanga chu best player-a thlan a ni.

1st Bn MAP Ground-ah inelna hi neih a ni a, Ward No. IX-in tun ṭum inelnaa top scorer S. Malsawmtluanga awm loh an tuar. Lengpui chhuanvawr Pa Roa'n minute 21-naah Vanlalpeka ball pek chu goal-ah a chantir a, goal hmahruai a khung.

Ward No. IX tan Albert Lalbiakmawia'n box pawn aṭangin siphurh sutna goal khung mah se minute 45-naah Pa Roa'n chakna goal a khung. Tualchhung football chanchin sawi apianga hmaih tawh loh tur, Pa Roa hian CYMA Football-ah Lengpui a champion pui tawh a, kum 40 pelh hnuah pawh a theihna sang tak la lantir zelin Lengpuiah champion nomawi an hawn leh ta.