Europa Conference League : A kum zawna final lut thei Fiorentina

Fiorentina chuan Club Bruges an hneh a, a kum zawnin Europa Conference League final an lut - Aston Villa leh Olympiacos inkhela a chak zawk nen nomawi an inchuh dawn a ni.

Nilaini zan second leg inkhelah team pahnih hi 1-1 in an inhnehtawk, Italian club hian an intawn hmasakna chhawr ṭangkaiin 4-3 in an chak. An intawn hmasakin 3-2 in hnehna an lo chang tawh tihna a ni.

Belgian club tan Hans Vanaken chuan minute 20-naah goal a khung a, an intawn hmasaka an siphurh awmchhun a sut zo chuah. Hun tawp dawnah Fiorentina hian Lucas Beltran-a penalty hmangin an chhanglet a, goal dang a lut zui tawh lo.

Season hmasa khan Fiorentina hian ṭha taka khelin final hial an thleng, mahse nomawi inchuhna inkhelah West Ham an ngam lo. Kuminah chuan season hmasa lama an tawnhriat aṭanga inzirin hlawhtling zawk nih ngei an tum tawh ang.

Fiorentina manager Vincenzo Italiano chuan, "Europa Conference League hi vawi hnih kan khelhna a ni a, final kan lut ve ve - sulhnu ṭha tak kan nei tihna a ni, chutihrualin awlsam taka tlang erawh kan ni bik lo.

"A tir lamah khan min nawr na em em a, goal pawh kan chhuah phah reng a ni. Semifinal a ni tawh a, hetiangah chuan vanneih leh vanduai inkar a hla ve bawk, a tawpah a vannei zawk kan ni," a ti.