NBA player hlu ber Jokic

Denver Nuggets centre Nikola Jokic chu NBA Most Valuable Player (MVP) atan thlan a ni a, basketball inelna lianah hian player hlu ber atan hian vawi thum an tlanna niin player ropui dangte huangah a lut.

Serbian star hi kum 2021 leh 2022 MVP atan khan thlan a lo ni tawh, season hmasa khan award hi dawng phak chiah lo mah se pahnihna a ni. Kuminah erawh a chung berah a awm leh ta, player pakua chiahin MVP nihna hi vawi thum an la ni tling thei a ni.

Record nei ṭha ber Kareem Abdul-Jabbar khan MVP atan vawi ruk thlan a ni a, Michael Jordan leh Bill Russell te kha vawi nga thlan niin; Wilt Chamberlain leh LeBron James te vawi li an ni tawh thung.

Jokic hian Larry Bird, Magic Johnson leh Moses Malone te hnung zuiin a vawi thum nan MVP a ni. Jokic chuan, "Ka tan chuan hun hlu leh hlimawm a ni a, ka damchhunga ka hriatreng tawh tur a ni bawk," tiin a sawi.

Player hlu ber thlannaah hian Oklahoma City Thunder guard Shai Gilgeous-Alexander chu pathumna a ni a, palina chu Dallas Mavericks guard Luka Doncic a ni thung, anni pahnih pawh hian season ṭha tak an hmang.

Tun season NBA-ah Jokic hian chawlhrualin match tinah 26.4 point, 12.4 rebound leh 9 assist a nei a, vawi 25 tehmeuh triple-double a nei a, a team Denver Nuggets hi regular season-ah khan Western Conference-ah pahnihna dinhmun a luah pui.

Playoff khelh laiah erawh Jokic leh Nuggets hian beisei an phak lo deuh. Conference semifinal-ah Minnesota Timberwolves nen an intawng a, game vawi hnih an khelh tawh chinah chak an la nei ve lo; Timberwolves lamin 2-0 in hma an hruai mek.

Best of seven series hmangin chak zawk zawn a ni a - May 11, Inrinni hian Target Center-ah game 3 an khel leh ang, conference final lut tur chuan a tlem berah vawi li tal an chak a ngai; Nuggets tan pawh beisei a la awm tihna a ni.

Eastern Conference semifinal lamah New York Knicks chuan Indiana Pacers lakah 130-121 in hnehna an chang a, anni pawh hian best of seven series-ah 2-0 in hma an hruai ve mek. May 11, Inrinni zing dar 4:30-ah game 3 an khel ve leh ang.

Nimin zing inkhelah hian Jalen Brunson chuan point 29 a nei a, ani bakah hian Donte DiVincenzo chuan point 28 a nei bawk a, hnehna an chan theih nan an thawhhlawk hle a, game 3-ah pawh inrintawkna sang tak nen an inlan leh dawn a ni.