Kan hmachhawp a lang ṭan - Chelsea Chairman

Chelsea chairman Todd Boehly chuan tun hnaia an result aṭangin Mauricio Pochettino hoa an hmachhawpte a lang ṭana a hriat thu a sawi a, Chelsea fan-te tan thu hriat nuam nge a nih nuam lo zawk, tih sawi thiam a harsa!

Tun season-a beisei phak lo Chelsea hian an league match hnuhnung pathumah tlawm an nei lo a, Aston Villa nen 2-2 a an inhnehtawk hnuah Tottenham Hotspur chu 2-0 in an hneh a, West Ham chu 5-0 in an sawp bawk.

Season laihawla Europa Conference League bak an beiseipui loh Chelsea hian tunah chuan Europa League an sawi ri ve leh tawh a, table-a parukna Newcastle United chu point hnih chiahin an phak lo tawh - match thum khelh tur a la awm.

Boehly chuan, "Kan match hnuhnung pahnih leh, Aston Villa laka second half kan khelh dan kha en ila, kan duh ang takin kan khel chhuak a, tlarhnung aṭanga game kan siam dan, ball kan inpek dan, goal kan nawr dan engkim mai kha a dik.

"Shot kan neih zozaite kha a tam em em a, khang game ho aṭang khan eng ang takin nge hna kan thawh tih chu inhmu thiam chho ṭan ang tih ka ring," a ti a, Blues hian Nottingham Forest, Brighton & Hove Albion leh Bournemouth an la hmachhawn dawn.

Boehly-a'n an ruahmanna a lan ṭan thu a sawi rualin, coach Pochettino dinhmun erawh a la chiang lo chhunzawm zel. Argentine coach hian nipui lai khan Blues enkawl turin kum hnih daih contract a ziak a, mahse, Chelsea hian coach an thlak rinna a lian.

Poch chuan, "Ka chungchang thu an sawi fo mai hi a tawp a hun tawh. Kum khat contract ka la nei a, club lamin thil thar engmah min hrilh lo a, ka la cham dawn a nih ka ring," tiin a lo sawi tawh.