Italian Open-ah Osaka a chak

Naomi Osaka chuan Nilaini zan khan Italian Open a khel ṭan, a match hmasa berah world number 45 Clara Burel chu 7-6(2), 6-1 a hnehin inelna bul a ṭan fuh hle a, a match lehpekah chuan seeded 19-na Marta Kostyuk nen an intawng leh dawn a ni.

Osaka hi fa a neih hnuah tennis khelh leh a ni a, atan thil a awlsam lo. A bik takin fa a neih hma pawhin clay court hi inkhelh harsa a tihna hmun a ni a, kum 2019 French Open hnuah clay bikah chuan tun ṭum hi world number 50 chin a hneh lehna hmasa ber a ni hial.

Japanese star hi a inkhelh loh rei avangin a ranking pawh a hniam hman hle, tlemin siam ṭha chho ve leh deuh mah se tunah hian number 173 a la ni a, inelna hmachhawn tur chuan qualifying a khelh a ngai ṭhin.

Italian Open hi ṭha tak a khelh thei a nih chuan French Open atan beisei a nei sang dawn a, a ranking siamṭhat theihna remchang a nih bawk avangin thapui a thawh ang, clay hnuah hian grass court season a la hmabak bawk.

Kum 26 mi Osaka chuan, "Set khatna a harsa hret a, set hnihnaah kha chuan nasa takin hma ka sawn. Match dangah pawh hmasawnna hmuh ngei ka inbeisei," tiin a sawi.

Inkhel dangah Bernarda Pera chuan amah ang bawka American player Caroline Dolehide chu 7-6(6), 6-3 in a hneh a, a hmabak chu world number 1 Iga Swiatek a ni, a hautak dawn hle. Magda Linette, Brenda Fruhvirtova leh Lesia Tsurenko te pawhin hnehna an chang ve bawk.