French Open beisei sangtu Djokovic

Novak Djokovic chuan season a hman ṭhat tawk loh chu siamṭhat theih ngei a beisei a, clay court inelna lian French Open an khelh hunah chuan a ṭhat dan taka a khelh chhuah leh theih tawh a beisei thu a sawi.

Serbian star chuan kumin atan French Open, Wimbledon leh Paris Olympic te a hmathlir hmasa an ni tih sawiin, "Thil tih tum leh hlen chhuah tur lian tak tak ka la nei a, chumi atan chuan inbuatsaihna pawh ka nei ngawrh hle.

"Madrid Open ka khelh loh chhan erawh thil dang a ni, tournament dang ngaihpawimawh avanga inlan lo chu ka ni lo. Ka kum a tam deuh tawk a, ka rilru chuan ka cho vek mah se ka taksa tlin tawk ka hriat a ngai," a ti.

Italian Open khelh laiah Djokovic hi a inlan dawn a, clay court inelna a nih avangin atan chuan French Open inbuatsaihna hnuhnung a ni nghal ang. Kuminah beisei anga a la khelh ṭhat tawk loh avangin insiamṭhat nghal ngei pawh a tum ang.

May 22, Nilaini hian Djokovic-a'n kum 37 a tling dawn tawh a, tennis khawvelah chuan player an nih chhunga a hun hnuhnung lam zel a ni tawh. Monte Carlo Masters zawh taka a sulhnu ṭha lo ang kha kalsan a tum.

Italian Open atana seeded pakhatna Djokovic chuan, "Monte Carlo ai kha chuan Rome-ah hi chuan ṭha taka ka khelh theih ka beisei. Ka beisei dan chuan French Open khelh hunah phei chuan ngai ka awh tawh ang," a ti.

World number 1 Djokovic hian Grand Slam nomawi 24 a chawi tawh a, major title lak hnem lamah amah hnaih bertu Rafael Nadal aiin nomawi pahnihin a nei tam zawk, a hmahruaina sawhngheh leh zual a tum dawn a ni.