Nadal hmachhawn tur Schwartzman

Court Philippe Chatrier-ah Rafael Nadal a inlan a nih chuan sulhnu ropui a hnutchhiah dawn a ni tlangpui, rin lawk ang ngeiin Nadal-a'n rawlthar Jannik Sinner hnehin French Open semifinal a lut.

Thawhlehni zan inkhel dangah US Open champion Dominic Thiem chu Diego Schwartzman lakah a chak lo thung. Zirtawpni zan dar 9:00-ah Nadal leh Schwartzman te hi final luh inchuhin an intawng leh dawn, a hmuhnawm ang.

Roland Garros inbuatsaihna Italian Open quarterfinal-ah khan Schwartzman hian Nadal hi a lo hneh tawh, clay court hi a inkhelh thiamna hmun a ni ve tho a, champion tura rinkai zinga mi Thiem a hneh theih bawk avangin inrintawkna a ngah dawn.

A match hmasa lamah Nadal tan harsatna a awm lo, quarterfinal hi atana fiahna hmasa bera ngaih a ni. Set hmasa berah kum 19 mi Sinner-a'n Nadal service a chhuhsak nghal a, Italian rawlthar hi a ball vuak a nain a che vel a hmuhnawm.

Mahse, tawnhriat ngah Nadal-a'n zawi muangin inkhel a thunun. Set khatnaah tie break ngai ve bawk mah se a hnu lamah chuan harsatna a awm tawh lo, 7-6 (7-4) 6-4 6-1 a chakin a vawi 13 nana champion a tumna a la kaltluang zel.

Grand Slam vawi 19 champion tawh Nadal chuan, "Sinner khan theihna a nei sang, tharum a ngahin a ball vuak a na hle," tiin a khingpui a fak. Sinner hian season hmasa khan ATP NextGen title a la a, rawlthar beiseiawm zinga mi a ni mek.

Semifinal thlir zuiin Nadal chuan, "Italian Open-ah ka hneh lo, tunah khawvela player ṭha ber zinga mi Thiem a hneh leh bawk, fimkhur taka ka khelh a ngai dawn," tiin a sawi. World number 1 hian Schwartzman hi vawi kua a hneh tawh a, an intawn hnuhnung berah erawh a chak lo thung.

New York khawpuiah Dominic Thiem-a'n US Open nomawi a chawi a, chawlh hahdamna hun nei mumal loin Paris khawpuiah inkhel turin a lut zui nghal. Austrian star hian khel ṭha chho viau mah se a tawpah erawh a chau tawngkhawng tih a lang.

Thawhlehni zan khan Court Philippe-Chatrier-ah Thiem leh Schwartzman te hi an inbei tawk hle, darkar nga leh minute riat zet an inkhelh hnuah erawh Argentine star zawkin 7-6 (7-1), 5-7, 6-7 (6-8), 7-6 (7-5) in hnehna a chang a ni.

Seeded pathumna Thiem chuan, "Chawlhna hun mumal nei miah loin Paris khawpui ka pan a, boruak a lo danglamin inkhelh pawh a harsa deuh. A nihna takah chuan ka chau tawngkhawng a, inelna hrehawm erawh a ni lo," tiin chhuanlam a siam duh lo.

Schwartzman hian tun hmain Thiem hi vawi hnih chauh a la hneh a, ṭum ruk a ngam lo thung. Tun ṭumah hian rinkai zawk ni lo mah se set hmasa ber aṭangin a khel nung zawk viau, a service na loin ball vaw zawi zawk ni mah se tihsual a neih tlem zawk miau avangin a dingchang.