England-in Wales mikhual dawn

Zanin dar 12:30 hian Wembley Stadium-ah England-in Wales an mikhual dawn a, friendly match chauh ni mah se England inkhel tur a nih miau avangin sawi zui tur a tam hle.

Three Lions hian September thla khan Iceland 1-0 in an hneh hram a, Denmark nen goal awm loin an inhnehtawk. Gareth Southgate hote inkhel a nung tawk lo a, Phil Foden leh Mason Greenwood ten hotel-ah nula an tawmpui avangin an chanchin an sawi zui nasa hle.

Manchester City leh Manchester United player-te hi tun ṭumah koh an ni lo a, chutihrualin khelmual pawnah chanchin ṭha lo an la nei zel. Chelsea striker Tammy Abraham chuan October 3, Inrinni khan a chenna inah kum 23 tlin lawmna a nei a, England-ah mi paruk aia tam pun khawm phal loh a nih avangin Covid-19 dan an bawhchhia.

Dan bawhchhe zingah hian Ben Chilwell leh Jadon Sancho te pawh an tel a, England training-na hmun St George's Park-ah kal an remtih nghal loh avangin Wales hmachhawn tur pawhin an dinhmun a chiang lo.

England team-ah hian season bul hmang ṭha zet Dominic Calvert-Lewin pawh a tel a, Everton striker chuan, "Manager-in England player tih tur a sawi chiang hle. Dan zawm tura tih kan ni a, fimkhur lehzual turin min hrilh," tiin a sawi.

Burnley goalkeeper Nick Pope pawhin, "Dan bawhchhiat hian mimal chauh ni loin team a nghawng avanginmanager-in fimkhur turin min ngen," tiin a sawi ve bawk.

Wales hmachhawn tur hian Nick Pope pawh a tan hun ṭha a inhawn rin a ni a, Calvert-Lewin pawh a goal khungna boot nen Wembley Stadium-ah England kawr ha tura beisei a ni bawk. Kum 23 mi Calvert-Lewin hian tun season-ah goal kua a khung der tawh a, heng zinga goal ruk hi Premier League a a khung a ni.

Ryan Giggs-a enkawl Wales pawh an kim dawn bik lo. Hliam vangin Gareth Bale leh Hal Robson-Kanu te an khel thei dawn lo a, Aaron Ramsey pawh Covid-19 vanga inkhung hran a ngaih avangin a inlan thei lo a ang.

England hian Wales an hmachhawn zawh hian Nations League-ah Belgium (October 11) leh Denmark (October 14) te an hmachhawn leh nghal ang.