Manchester United-in Sarr la dawn lo

Manchester United chuan Watford winger Ismaila Sarr la turin hun la nei mah se, squad thlak danglam an tum tawh lo. 

Domestic Transfer hi October 16-ah a tawp a, Premier League club pahnih inkarah transfer theih loh mah se Premier League club hian an hnuaia club-te aṭangin player an lalut thei a ni.

United hian transfer tawp niah Edinson Cavani, Alex Telles, Amad Diallo leh Facundo Pellistri te lalut mah se mual sira khel tura an lak duh Jadon Sancho leh Ousmane Dembele te an la thei lo. English club-in Sarr lak an tum lohna chhan pakhat chu tun Thawhlehni khan Champions League a player ziahluh hun a tawp a, Man United-in Sarr hi la mah se Europe inelna lianah an chhawr thei dawn lo.

Ole Gunnar Solskjaer-a'n Sancho la thei ta lo mah se tlarhma player-teah a lungawi nia hriat a ni a, United hian Marcus Rashford, Mason Greenwood, Anthony Martial, Daniel James, Odion Ighalo bakah player thar Cavani leh Pellistri te an neih belh. 

Kum 18 mi winger Pellistri hi a kum la naupang deuh mah se Solskjaer-a'n first team zingah a telh dawn nia sawi a awm a, Uruguayan player hi training-naa a chet danin a hmalam hun tur a hril ang.