James awmna Lakers tan nomawi a hnai

Aw rawl ring takin LeBron James a au a, a sirah Anthony Davis chuan lawm avangin a awm a chum dawp bawk - player ropui pahnih hian hlawhtlinna chan châka an tuihalna chu thil tih hmangin an lantir. Los Angeles Lakers chuan NBA champion ni turin match khat chak chauh an hmabak tawh.

Nimin zing NBA Finals game 4 inkhelah Lakers lamin 102-96 in Miami Heat an hneh, best-of seven series-ah James awmna hian 3-1 in hma an hruai ta. October 10, Inrinni zing dar 6:30-ah game 5 an khelh chhunzawm ang.

Game 3 a hnehna an chan avangin Heat an phur a, an thiampuipa Jimmy Butler a awm bawk avangin inrintawkna an nei sang. Inkhel ṭan tirah Bam Adebayo chuan basket rawn nei nghalin a team chu bul a ṭan fuh pui viau.

Mahse, Heat lam lawm chhung a rei lo. Anthony Davis-a'n 'dunk' hmangin a chhanglet a, hun tawp dawn 39.5 seconds chauh a awm tawh tihah team pahnih hi 83-83 in intluk mah se Davis bawkin 3-points vawm lutin Lakers hma a hruaipui a, a tawp thlengin an chungnung.

Orlando, Florida a inkhelah hian James-a'n point 28 a nei leh a, mimal point nei hnem ber a ni. Amah thlawptu Davis-a'n point 22 a nei bawk. Heat tan Butler chuan point 22 bakah rebound vawi 10 lain double-double a nei, khel ṭha mah se thlawptu erawh a nei ṭha tawk lo.

Tun hnai season 10 chhunga a vawi khat nan Lakers chu NBA champion ni turin an dinhmun a ṭha tawh a, star player James pawh a lungawi. American center chuan, "Inkhel duhthusam hi chu a awm thei lo, tih fuh loh leh dik lo lai deuh chu a awm ve zel.

"Mahse tun ṭuma kan inkhel te kha kan thlir kir a nih chuan basket kan venghim ṭha em em a, a pawimawh hunah point kan nei thei bawk. Team ṭha kan hmachhawn a nih chuan mahni inveng chunga chak dan hriat a ngai," a ti.

Miami shooting guard Butler chuan, "Tun aia ṭha khan kan khel thei tih ka hria, kan dinhmun hniam zawk mah se tho chhuak turin beiseina kan la nei. Hnehna chang let tur erawh chuan sawisel tur awm lo deuhthawa kan khelh a ngai tawh," tiin a sawi.