Hmun râlṭiah Arsenal an lut dawn!
Arsenal hian chak hleih theih lohna hmun an nei, a hming chu Old Trafford a ni a, a neitu chu Manchester United an ni. Pathianni zan dar 9:00 hian 'The Theatre of Dreams' tia an sawi hmun ngeiah mai hian club pahnih hi an intawng dawn.
A hun thu hlaah chuan duhthusam tiin a sawi theih - zan inkhawm an bang hman ang a, mahni inah emaw ṭhiante ina a huhoa en duh tan a remchang dawn. Khua in zah ngai se, ṭek leh thlipui te pawhin harsatna an siam loh beisei ang.
Man United hian Premier League nomawi an beisei phak tawh lo. Mahse, April thla mai khan Liverpool beiseina an chhut chhiatsak tawh a, tunah pawh Gunners beiseina ti tawp thei dinhmunah an ding leh mek - an chak zawng tak a ni dawn.
Arsenal an phur
Premier League match khelh hmabak pahnih chiah an nei tawh a, an tih theih sang ber chu chak ve ve a ni. Zanin hi Arsenal tana hna hautak zawk tura ngaih a ni a, an chak hleih theih lohna hmun a nih avangin an tim deuh mai thei, tunlai an boruak vang erawh chuan an phur khawp ang.
Gunners hian hliam langsar an nei tawh lo, coach Mikel Arteta-a'n a duh ang takin a naute a rem thei dawn. An ṭhat dan taka an khelh chuan Gabriel Jesus pawhin hmun a chang tawh loa ngaih a ni, a laiah Kai Havertz a awm lehin a rinawm.
German forward Havertz hian a tir lamah sawisel a hlawh, season chawhnu lamah erawh Arsenal player pawimawh bik a ni a, a sirah Bukayo Saka awmin Martin Odegaard leh Declan Rice ten an thlawp ang, midfield thunun zawk nih an inring khawp ang.
Contract ziak thar Jorginho boruak a fuh a, chutihrualin tharum ngah zawk Thomas Partey zawkin Rice a thlawp a rinawm. Arteta-a'n counter attack hman a tum a nih chuan Gabriel Martinelli kan hmuh a rinawm - Man United an tawm tlat a nih erawh chuan Leandro Trossard hmanga sut kuak a fuh zawk ang.
EPL goal chhuah tlem ber an ni a, tlarhnungah Gabriel leh William Saliba te an inkawp rem ṭhat em avangin an ngaihtuahawm loh. Chutihrualin, a sir lam an veng thiam tawk lo deuh ṭhin - Man United tan a laiah aiin a sir aṭanga nawr a fuhin a rinawm.
Martinez a dam
Kumin chu Manchester United damdawi in a lun em em reng a, a bik takin an tlarhnung an buai thei hle. Crystal Palace an hmachhawn ṭum phei chuan tlarhnung laiah Casemiro a din a ngai hial, goal li chhuahin an mualpho chiang hle.
Tun kar chhoah Lisandro Martinez-a'n training pangngai a zawm tawh, Argentine defender hi hun rei tak inkhel thei tawh lo a ni a, coach Erik ten Hag tan eng chena rin thiam tur nge hriatthiam a harsa mai thei, a inlan a nih chuan Jonny Evans nen an inkawp thei ang.
Man United senior team training-ah hian Harry Amass, Louis Jackson, Habeeb Ogunneye, Toby Collyer leh Ethan Wheatley te hmel pawh hmuh tur a awm, defender an mamawh takzet tihna a ni a, hmel thar deuh pawh kan hmu thut mai thei bawk.
Marcus Rashdord pawhin training a zawm a, English forward hi a khelh ṭhat vak loh lai pawha Arsenal ti mangang thei ṭhintu kha a ni a, mual sirah Ben White tana hna hautak siamsak thei tur a ni, a tlan chakna chu hmanraw hlahawm a ni leh thei bawk ang.
Tun season Man United player hriam ber tia chhal ngam chu Alejandro Garnacho a ni a, ani hi ven uluk ngai tur a ni. Sum tam tak senga beiseina sang tak nena an lei - striker tharum ngah Rasmus Hojlund tan pawh a thei a nih chuan tun hi hming chherna hun tur dik a ni.