MPL-ah FC Bethlehem an kir

Mizoram Premier League Season 11 Qualifier-ah nimin khan FC Bethlehem chuan MFA Cup champion MLS FC 3-0 in an hneh a, MPL khel turin an tling. ADFA First Division champion Bethlehem hian match thum aṭangin point sarih an hmu a, chak loh an neih loh bakah MFA Cup final phuba an la tel.

RG Stadium-a inkhel dangah SYS FC-in Bethlehem Vengthlang 3-0 in an hneh a, pahnihna niin playoff an khel dawn. Lunglei club hian MPL10-a pasarihna Kolasib club Project Veng FC nen double legged playoff an khel ang.

SYS an thiam

SYS FC-in point thum duhin an tuihal tih a lang a, minute ngana lekah Isak Lalmalsawma ball pek luh chu Joel Lalramengmawia'n a khung nghal. BVT lakah SYS an chungnung a, first half-ah Nicholas Ngurthansanga'n a khung belh.

Second half-ah goal hmuh tur awm lawk lo mah se injury time-ah Joel-a'n a tauh goal. SYS 3-0 in an chak a, an theihna tak tak chu MPL10-a pasarihna Project Veng lakah fiahin a awm ang.

FCB an kir

SYS an chak avangin FC Bethlehemin MPL khel turin chak ngei an mamawh. Coach Lalhriatpuia Sailo kaihhruai Bethlehem hian MFA Cup-a an hneh loh MLS lakah inkhel an thunun zawk a, Lawngtlai player Rothangliana'n an lama a tihluh zarah an dinhmun a ṭhat phah bawk.

Playoff khelh tura chak mamawh MLS-in second half-ah risk lain attacking football an khel a, Bethlehem lamin Kiran Chhetri leh Moses Lalrinzuala ten hmanga hma taka an khung zarah harsatna an tawk lo. FCB-in an phu angin 3-0 in an chak a, MPL khel turin an tling.

Coach Hriatpuia chuan, "Pathian min awmpui vang a ni a, MPL khel tura kan tling hi kan lawm. Player-ten an tum a, club thuneitute an ṭang a, rah duhawm tak kan seng a ni," tiin Vanglaini a hrilh.