Vawinah CYMA Cricket Final Dream Final : Durtlang Vs Ramhlun Venglai

CYMA leh Cricket Association of Mizoram buatsaih 12th Inter Branch Cricket Tournament final chu Durtlang leh Ramhlun Venglai ten vawiin chawhma dar 9:00 hian Lammualah an khel dawn. Inelna ṭantirh aṭanga final khel tura rinsa an nih avangin 'Dream Final' tia chhal theih a ni.

Inkhel hi a hmuna en a nuam dawn, chutihrualin CYMA leh LPS YouTube-ah live hmanga pek chhuah a ni ṭhin bawk.

Nimin khan Lammualah semifinal khelh a ni a, Durtlang hian vawi thum champion tawh Chanmari hneh turin harsatna an tawk lo. Ramhlun Venglai pawhin awlsam takin Luangmual an hneh a, semifinal leh final hi ni zawn ni mah se 'warm up' match ṭha takah a ngaih theih zawk ang.

Football aiah Cricket

Mizoram football a lar ber a, Ramhlun Venglaiah erawh football aiin cricket a lar zawk. RVL-in cricket an tuichilh bawk a, 'Home of Mizoram cricket' ti hiala sawi theih an ni.

RVL coach Vanlalzuata chuan, "NCA-a inzir mek pathum K. Vanrotlinga, Johan Lalbiakkima leh Emmanuel Lalpekhlua te kan nei a, heng pathum tel lo pawh hian kan ṭha zawk. Keini hi chuan Mizoram junior team-a mi pathum chhawr loin kan dah. Player 11 ṭha kan nei tihna a ni a, kan champion leh ngei turah ka ngai," tiin inringtawk takin Vanglaini a hrilh.

Ramhlun Venglai hi mawlmang taka inrinktawk an ni lo a, inelna hmasa berah final an luh tawh bakah kum 2006 khan a vawi khat nan an champion. Kum 2008 aṭangin cricket academy mumal tak an nei a, hei hian ṭha a thlen.

Final-ah pawh team pahnih danglamna tur chu, RVL hian bowler ṭha panga - pace bowler pathum Remruatdika Ralte, Rodawngzela leh Lalrinfela Zadeng bakah spinner Vanlalrinzuala leh Joseph Lalthankhuma te an nei. Tun ṭum inelnaah pawh RVL laka run 100 chuang siam thei chu Sihphir chauh an ni a, target a san vanga vawm ngai lo deuh an vawm tir vang chauhin Sihphir hian 122 runs siam thei an ni.

Nomawi inchuhnaah chuan RVL tan inthlahdah a thiang tawh dawn lo a, a tir aṭangin sa huai an ser ang. Batting lamah Joseph Lalthankhuma a hmuhnawm ṭhin a, final-ah pawh en bik a sual lo ang.

Beisei neitu Durtlang

Durtlang hian CYMA Cricket final vawi nga ngawt an lut tawh a, vawi khat chauh an la champion. Inelna hnuhnung pathumah final an lut vek chungin Ramhlun Venglai lakah an tlawm vek. Kuminah pawh Durtlang hian nomawi an duh a nih chuan CYMA Cricket final-a an la hneh ngai loh Ramhlun Venglai hi an hneh a ṭul dawn.

Semifinal-ah Durtlang hian champion turin theihna an nei sang tih a lang a, champion inbeisei Chanmari an sawp. Durtlang tan bowler C. Remruatpuia leh H. Zothanchhunga te an cheṭhat a pawimawh dawn. Semifinal-ah Remruatpuia'n wicket li a la a, hei hian inrintawkna nasa tak a pe ang.

Chutihrualin final hi entu lam duhthusam a ni a, batter inbeihna a ni dawn. RVL-in an batter-te an chhuang a, Durtlang lamin Lalhruaizela leh Marty Lalrinhlua te an kawl. Hruaizela leh Marty te kutah thui tak a innghat dawn.

Durtlang manager Dr Vanlalchama (Chatea) chuan, "Champion tumin kan inpuahchah a, champion ngei pawh kan inbeisei. RVL hi team ṭha an ni a, 50-50 ah ka ngai. Bowler che ṭha zawk zawk an champion turah ka ngai a, Pathian kutah kan innghat e," tiin Vanglaini a hrilh.

Final khelhna tur hi Sihhmui a ni lo a, cricket ground dik taka khelh tur chu ni se RVL hi vanduai thei lo tura ngaih an ni. Mahse, artificial turf chunga khel tur an nih dawn avangin Durtlang tan beisei tur a awm.