I League khelh hun tur December?

India rama league sang ber ni ṭhin I League khelh tur a la chiang thei lo a, I League CEO Sunando Dhar chuan December kartawpah khelh ṭan theih a beisei thu a sawi thung. 

I League hotupa chuan, "I League club neitute nen indawrna kan nei a, Covid-19 vangin club ṭhenkhat chuan training pawh an la ṭan thei lo a, ram pawn player lakluh thlengin buaina an tawk," a ti a, club lam harsatna avanga league sawn thei dinhmuna an din thu a sawi. 

Sunando chuan, "Club thunei-tute nena kan thu inhmuhna ber chu thla khat tala league khelh hun sawn a ni a, hemi chungchangah hian IFA (Indian Football Association) leh West Bengal sorkar pawh kan dawr tawh.

"Thutlukna kan siam thuai ang a, December kar tawpah league hi khelh ṭan kan beisei," a ti a, Krismas leh Kumthar boruak karah inelna bul ṭan a beisei thu a sawi. 

AIFF ruahman anga thil a kal thei a nih chuan I League khelh ṭan ni tur hi December 26 a ni dawn a, Mizote tan chuan 'ruaiṭheh ni' a ni - inelna hi Kolkata khawpuiin a thleng dawn. 

Covid-19 vangin league hi Kolkata-ah chauh hian khelh tur a ni dawn a, hei hi league sawn chungchanga AIFF-in IFA (West Bengal football thuneitu) leh West Bengal sorkar a rawn chhan pawh a ni. 

Aizawl FC pawhin I League khel dawn mah se Mizoram lamah chuan an inkhel en tur a awm dawn lo tihna a ni a, Mizo club hi transfer bazar lamah an che na hle tawh. 

Mizo club hian rampawn player zingah Princewill Emeka Olariche chu Manipur club Trau FC aṭangin an lalut tawh a, Nigerian striker bakah hian midfielder Alfred Jaryan leh defender rinrawl Richard Kassaga-te chuan kum khat atan an contract an pawtsei leh tawh bawk. 

Covid-19 vangin I League-ah pawh kalphung thar kalpui a ni dawn a, season danga vawi hnih ṭheuh team inhmachhawn ṭhin chu vawi khat inkhelhah tihtawi a ni. 

Team 11-in inelna hi an hmachhawn ang a, first phase-ah team 11-te hi an intum kual vek ang. First phase zawhah hian a sang zual tam panga chu group hranah dah an ni ang a, inkhel kualin champion tur team an zawng ang. 

Hetihlai hian top five a lang phak lo team paruk chu group hranah dah an ni ve leh bawk ang a, anni erawh relegate tur zawngin an intum kual dawn thung - I League a hmuhnawm dawn.

I League kalphung hi Covid-19 vangin khawvel hmun hrang hranga league ṭhenkhat chuan an kalpui nual tawh a, Asia khawmualpui bikah chuan Chinese Super League chu he league kalphung kalpuitu langsar an ni.

I League champion Mohun Bagan chuan ATK nena inzawmin season tharah Indian Super League an khel tawh dawn a, an club hmingah ATK Mohun Bagan tih an ni. 

Bagan hmelma kumhlun East Bengal pawhin thawhpui thar neiin India rama cement company hlun Shree Cement nen an thawkdun a, sum an ngah thar avangin ISL lamah Bagan an zui. 

Bagan hmun ruak luah tur hian Sudeva FC chu lilamna kaltlangin I League club ni tura thlan an ni tawh a, Delhi club hi India ram khawpui ber aṭanga I League khel tur club hmasa ber an ni. 

Hmun ruak dang pakhat hi I League second division champion-in an rawn luah dawn thung a, inelna hi vawiin chawhnu dar 12:30 aṭanga khelh ṭan tur a ni. 

I League second division 2019-20 season hi January 2020 khan khelh ṭan a ni a, group A, B leh C-ah ṭhen hran niin group B-ah team panga an awm a, A leh C-ah team paruk ve ve an awm thung. 

League round group B leh C-a a sang pahnih leh group A lama a sang berte chu final round khel turin an tling - group tinah hian I League/ISL club reserve team pathum ṭheuh an tel. 

Group A aṭanga team pakhat chiah an tlin chhan hi table a pahnihna hi ATK reserve an nih vang a ni a, reserve team tan division sawn theih a ni ve lo. Group B leh C lama a sang pahnih erawh club pangngai ve ve an ni thung. 

Final round a team panga te hi an inkhel kual leh vek ang a, table a a sang ber chu season thara I League khel turin an tling ve nghal ang. 

I League second division pawh hi Kolkata khawpui thoin a thleng a, Ahmedabad club ṭha ARA FC, Kolkata club Mohammedan SC & Bhawanipore FC, Delhi club Garhwal FC leh Bangalore club ṭha FC Bengaluru United-te an inel ang. 

Second division inelnaah pawh hian Mizo an inlan dawn. Mohammedan SC-in Vanlalbiaa Chhangte an kawl a, Hriangtlang tlangval hian Minerva Punjab FC tan pawha lo khel tawhin MPL lamah Chanmari West FC, Chanmari FC leh Chhinga Veng FC tan pawh a lo khel tawh. 

Bhawanipore-ah Aizawl FC forward hlui Ansumana Kromah a khel bawk. Kum 27 mi Yan Law enkawlna hnuaia khel tur Mohammedan hi squad chhah bera chhal ngam an ni a, Aizawl FC defender hlui Eze Kingsley leh  tawnhriat nei ṭha Willis Plaza-te ho an kawl a, second division-ah chuan tawh an khirh khawp ang.