TNT lakah Chhinga Veng an chak

Champion lai Thutak Nunouitu Team hian season hmasa lama an boruak ang kha an la nei rih lo, chet fuh chang nei mah se an chesual leh zauh ṭhin. Ather Pro Volleyball League 2024 khelh laiah a vawi hnih nan an tlawm ta.

LPS Arena, Falkland-ah Ningani zan khan Chhinga Veng Spikers chuan TNT hi 21-25, 25-21, 25-21, 18-25, 15-10 (3-2) in an hneh a, match thum an khelh tawh chinah Spikers hian a vawi khat nan hnehna an chang.

Chhinga Veng Spikers tan Yougank Baliyan leh Lalramhluna te pahnih point belhkhawm chu 51 a tling a, an team an chak pui. League match pahnih an la neihah semifinal lut thei turin beiseina an insiam a ni.

Spikers hi set la lo in Tuichangral leh Hunthar lakah an tlawm tawh a, boruak rit takin a delh beh chhungin an khel a, an tlawm leh a nih chuan an hmabak a thim hle dawn tih hre chhungin Yougank chuan vawi 34 hlap tlain point 12 a hloh.

Ramhluna'n point 17 leh Lalchungnunga'n point 11 hmuin tum nga ve ve an tisual a, Lalneihpuia Hrahsel chuan tum 12 vaw tlain point sarih a hloh zat Thangzika Pautu chuan hlawh chhuak ve thungin point hnih chiah a paih a ni.

Tuichangral leh Durtlang North laka an chak zawn hnuah TNT-in harsatna an tawk thar leh thung. Zosangzuala (Lalmama) chuan ṭum hnih tisualin point 25 a thawk chhuak a, a vawi hnih nan Kuriz Player of the Match ni mah se Vanlalṭanchhana (Valbuanga) chuan beisei a phak lo thung.

Chhinga Veng hi chak mah se set hnih an hloh avangin league point thum hlawh chhuak zo lo. May 16, Ninganiah Durtlang North nen an inhmachhawn ang.

TNT-in point khat an hmuh belh a, champion lai hian May 17, Zirtawpniahah league match hnuhnung atan anmahni ang bawka Mizo hlanga khel Hlimen nen an intawng dawn a ni.