Tlawm thei lo Bayer Leverkusen - Europa final an lut!

"A tlawm ve lo Lalnu Ropuiliani" tih hla kha in hria em? Football fan-te chuan, "A tlawm ve lo Xabi Alonso" kan ti mai dawn em ni? Spanish coach hian Bayer Leverkusen chu Europa League final a hruai thleng leh ta.

Ningani zan khan Europa League semifinal second leg-ah Leverkusen hian AS Roma chu 2-2 in an inhnehtawkpui a, inkhel pahnih belhkhawmah 4-2 a chakin Europa League final an lut - match 49 zet a zawnin an tlawm ta lo a, record thar an siam.

Roma hian Leandro Paredes-a penalty chhuih luh vawi hnih hmangin 2-0 in hma an hruai a, mahse, Leverkusen hian Gianluca Mancini (own goal) leh hun pek belha Josip Stanisic goal hmangin Italian club hi an inhnehtawkpui leh hram.

Europa League final hi May 22, Ningani zan dar 12:30-ah khelh a ni dawn a, Marseille hnehtu Atalanta leh Leverkusen ten champion an inchuh ang - Atalanta hian semifinal lehlamah Marseille hi 3-0 in an hneh a, inkhel pahnih belhkhawmah 4-1 in an chak.

Mikhual tlangnel

Roma khelmuala 2-0 a chak tawh Leverkusen-in Germany-ah pawh inkhel an thunun zawk a, mahse, goal khung an harsat. First half-ah Granit Xhaka chuan post a pet per a, Roma keeper Mile Svilar chuan Adam Hlozek leh Amine Adli te hun ṭha neih ṭha zetin a dansak bawk.

Leverkusen-in an goal khung theih loh rah an seng zui. Captain Jonathan Tah chuan Iranian forward Sardar Azmoun titluin penalty a chawi a, Paredes chuan harsatna nei loin goal-ah a chantir.

Second half-ah pawh thawnthu a danglam lo. Roma keeper Svilar a che ṭha chhunzawm a, Jonas Hofmann chauh a hmachhawn chungin goal a chhuah duh lo a, Leverkusen bawk an chesual zui.

Hlozek chuan a handball vangin penalty a chawi a, Paredes bawk lo pen chhuakin, goal-ah a chantir a, 2-0 a ni. Italian club-in an goal hnihna an khung hian minute 66-na a ni a, a vawi khat nan Leverkusen an tlawm ngei dawn niin a lang.

Tlawm thei lo

Mahse, football-in Leverkusen lam a ṭang emaw tih mai tur a ni. Vawi 13 zet save neia che ṭha em em mai Roma keeper Svilar meuh pawh a chesual - corner aṭanga ball kal, awlsam taka man mai tura lang chu a man thei lo a, a kal tlang.

Ball hian Svilar hnunga ding Mancini a per zui a, goal-ah a lut. 2-1 a nih hian inkhel hmasa nena belhkhawmin Leverkusen chu 3-2 in an la chak zawk a, an tlang dawn. Mahse, German club hian record siam ngei an duh a, an nawr zui.

Hun pek belh minute sarihnaah Stanisic chuan striker tiha mawiin ball a la lut a, ṭha zetin goal-ah a chantir. Hun pek belhah si phurh an sut zo a, tlawm tura ngaih Leverkusen-in draw result an hlawh chhuak a, first leg result nen final an lut!

Leverkusen hi match 49 zet a zawnin an tlawm ta lo a, Portuguese player ropui Eusebio hoa Benfica record lo siam tawh chu an lehpel. Benfica hi December 1963 - February 1965 inkar kha match 48 zet a zawnin an lo tlawm lo tawh a, he record hi Leverkusen chuan an rawn khum ta a ni.

Tlawm duh lo

Leverkusen wing-back Jeremie Frimpong chuan, "Tlawm turah min dah suh u, second tlemtêah pawh thil danglam kan thlentir fo. Tumah hi kan beidawng ve ngai lo a, goal chhuah hmasa mah ila, kan sut leh tho rinna lian tak hi kan nei ṭhin a ni," a ti.

German club hian match 49 a zawna tlawm loa an kaltluannaah hian vawi 40 zet hnehna an chang thei a, an record hi uanpui tham a ni. Bundesliga-ah an champion chiang tawh a, tunah DFB-Pokal leh Europa League final-in a hmuak mek a, treble champion an hnaih ta hle.

Leverkusen hian league match hnih khelh an la hmabak a, match hnihah an tlawm loh a, final pahnihah an chak bawk chuan tlawm nei loin treble champion an ni dawn tihna a ni - record khum leh mai harsa tak a ni dawn.

Celtic chu 2016-17 season khan tlawm nei loin domestic treble champion an ni a, mahse, Champions League lamah tlawmin group stage-ah an tla thung. Ajax chu 1994-95 season khan Eredivisie leh Champions League-ah an champion a, mahse, KNVB Cup-ah an tlawm thung - Leverkusen tan thawnthu ngaihnawm, tuma la ziah ngai loh ziak turin kawng a inhawng mek e.

Tlai ngai lo

Leverkusen zinkawng tingaih-nawmtu chu hun tawp dawnah chakna emaw draw-na goal an khung thei lutuk hi a ni - tun season-ah hun pek belha goal khung hi vawi 17 an nei tawh a, Liverpool nen European football-a injury time-a goal khung hnem ber an ni mek.

An inan lohna erawh Liverpool chuan League Cup chiah champion nomawi sawi tur an nei a, Leverkusen erawh an treble champion lo ang tih a sawi theih lo.

Leverkusen midfielder Granit Xhaka chuan, "He team hian tlawm kan duh lo a, chu chu inhmu theiin ka ring. Tlawm loa kal zel kan duh avangin goal thun kan châk em em zel a, tunah chuan match 49 a zawnin kan tlawm lo ta - kan hnathawh hi kan chhuang khawp mai," a ti.

League ang zawng chuan Leverkusen hi league match 32 a zawnin an tlawm lo tawh a, record thar siam turin season thara an chet ṭhat tel a ṭul dawn. May 91 - March 1993 inkar khan AC Milan chu league match 58 zet tlawm loin an lo kaltluang tawh.