City penalty kha pek loh tur a ni - Panel

Manchester City-in an league match hnuhnung berah 5-1 in Wolverhampton Wanderers an hneh a, an goal hmasa ber hi Erling Haaland-a'n minute 12-naa penalty aṭanga a khung a ni.

Haaland hian goal thum dang khung zuiin, Julian Alvarez chuan goal khat a thawh ve bawk a, Wolves tana Hwang Hee-chan goal khung chu mualpho zualpui khuhna mai a chang.

Mahse, Key Match Incident Panel chuan thil thlen dan zirchiangin, City goal hmahruai luhna penalty chu penalty tur a ni loh thu an sawi - awmzia erawh a nei thui tawh lo!

City-in penalty an hmuh dawn hian Wolves defender Rayan Ait-Nouri leh City defender Josko Gvardiol te chu penalty box-ah insu buaiin, referee Craig Pawson chuan penalty spot a kawk.

Mahse, panel-te chuan thil thlen dan hi zirchiangin, member panga awmna panel zinga pathum chuan penalty tur a ni loah an ngai a, pahnihin penalty-ah an pawm thung.

Panel-ah hian mi pathum chu player hlui emaw coach hlui emaw an ni ṭhin a, pakhat chu Premier League aiawh niin, pakhat chu Professional Game Match Officials Board aiawh an ni ṭhin thung. Panel-te chuan, "Player pahnih an insut khan, ball inchuhnaa player chet ṭhin dan pangngai a ni a, thil dik lo a awm lo," an ti.

Hetihrual hian video assistant referee inrawlh lo chu thil awm tak a nih thu an sawi a, Arsenal-in 3-0 a Bournemouth an hneh ṭuma Cherries tana Antoine Semenyo goal khung pawm loh chu a dik thu an sawi bawk.

City hian vawiin tlai dar 5:00-ah league match an khel dawn a, khualmualah Fulham an lenchilh ang. Pep Guardiola enkawl team hian Tottenham Hotspur leh West Ham an la hmachhawn leh dawn bawk a, an chak vek chuan an champion ang.