Atalanta-in Marseille an ngam

Europa League quarterfinal aṭanga Liverpool pet chhuaktu Atalanta chuan Europa League final an lut ta a, semifinal second leg-ah Marseille chu 3-0 in an hneh - first leg-ah 1-1 in an lo inhnehtawk tawh a, inkhel pahnih belhkhawmah 4-1 in an chak.

Atalanta hian chak ngei duhin, a tir aṭangin Marseille an nawr nghal a, Italian club tan hian Ademola Lookman chuan minute 30-naah goal hmahruai khungin, Matteo Ruggeri chuan second half-ah a belhchhah a, El Bilal Toure chuan hun pek belhah chakna goal a khung.

Gian Piero Gasperini enkawl Atalanta-in an club chanchina a vawi khat nan European football-ah final an lut a, Marseille-in Iliman Ndiaye leh Jordan Veretout hmangin chance nei mah se, goal-ah an chantir thei lo a, 3-0 in an tlawm.

Europa League final-ah Bayer Leverkusen leh Atalanta an intawng dawn a, mipuiin hei hi an en châk tawh. German club-in tlawm nei loa treble champion nih an tum a, Atalanta erawh an chak chuan an club chanchina nomawi langsar an chawi vawi hnihna tur a ni ang.

Atalanta hian 1962-63 season khan Coppa Italia nomawi an lo chawi tawh a, hemi hnuah hian nomawi lian tham chawi an nei leh tawh lo.