Nadal a chak hram

Rafael Nadal tan tun hma angin thil a awlsam tawh bik lo - Italian Open khelh laiah pawh harsa takin a chak hram. Ningani zan inkhelah Nadal hian a khingpui Zizou Bergs chu 4-6, 6-3, 6-4 a hnehin second round a lut.

Rome khawpuiah hian tun hma chuan Nadal hi vawi 10 ngawt a champion tawh, atan hmun duhthusam leh nuam a ni. Tun ṭumah erawh qualifying aṭanga invaw kai lakah set a hloh hmasa phawt, a hnu lamah erawh a tho chhuak leh thung.

Kum 37 mi Nadal hian tun season tawp rualin tennis chawlhsan a rikruk thu a lo sawi tawh a, a tan tournament hnuhnung ber a ni thei zel tawh, chuvangin a inkhel entu an tam ṭhin a, a hmuna thlawptute thawm pawh a ṭha thei hle.

Grand Slam vawi 22 champion tawh Nadal chuan, "Tun hma lama ka inkhel nen chuan a la inang lo khawp mai, kum hnih chhung deuhthaw inkhel mumal lo ka nih avangin ngaiawh tur chuan thil hi a awlsam lo ve bawk.

"Roland Garros khelh hmain chawlhkar hnih ka la nei, chumi hma ngei chuan nasa taka hmasawn ka la ngai. Paris khawpuia inkhel tur ringawt ka ngaihtuah tihna a ni lo a, tournament hrim hrimah hmasawn ka mamawh," tiin a sawi.

Inkhel dangah Serbian tlangval Hamad Medjedovic chuan Alexei Popyrin chu 6-3, 6-2 in a hneh a; Thiago Seboth Wild pawhin qualifying kaltlanga inla Gregoire Barrere chu 6-4, 6-2 a hnehin Dominik Koepfer chuan Andrea Vavassori 6-4, 6-3 in a hneh bawk.

Hmeichhe inelna lamah player langsar - Iga Swiatek, Coco Gauff leh Naomi Osaka te pawhin an khingpui ṭheuh an hneh a, harsatna lian tham tawk loin round of 32 an inhlangkai vek a ni.

World nu,ber 1 Swiatek hian Bernarda Pera chu darkar khat leh minute 17 chhungin 6-0, 6-2 in a hneh a; Rome khawpuia clay court inelnaah hian a vawi thum nan nomawi chawi a tum mek a ni.

American player Gauff pawhin darkar hnih leh minute 28 chhungin Magdalena Frech chu 6-3, 6-3 in a hneh. Japanese star Osaka pawhin world number 20 Marta Kostyuk chu 6-3, 6-2 in a hneh bawk.