Celtics nihrualtu Cavaliers

Donovan Mitchell-a point29 neih hmangin Cleveland Cavaliers chuan Boston Celtics chu 118-94 in an hneh. Eastern Conference semifinal khelh laiah team pahnih te hi 1-1 in an inhnehtawk mek.

Nimin zing TD Garden-a inkhelah team pahnihte an inkhel tawk hle, quarter hmasa pahnih an khelh zawhin an point neih a inzat. Inkhel chawhnu lamah erawh Cavaliers an chungnung a, a tawp lamah phei chuan harsatna lian an tawk zui lo.

Cavs chakpuitu Mitchell-a chuan, "Kemah chauh ka ni lo, kan vaiin kan khel ṭha vek. Game 1 kan khelhah khan chak lo mah ila inrintawkna kan neih belh nasa hle a, chumi rah chu game 2-ah a lo lang chhuak ta a ni," a ti.

A vawi 18 nana NBA champion nih tum Boston tan Jayson Tatum-a'n point 25 nei mah se chakpui nan a tawk zo lo. Best of seven series a nih avangin chak tur a la chiang lo. May 12, Pathianni zing dar 6:00-ah game 3 an khel leh ang.

Nimin zing inkhel dangah Dallas Mavericks chuan Oklahoma City Thunder chu 119-110 in an hneh a, anni pahnih pawh hi Western Conference semifinal khelh laiah 1-1 in an inhnehtawk mek a ni.