Saina leh Kashyap inhnukdawk

Indian badminton player Saina Nehwal leh Parupalli Kashyap te chu Denmark Open khelh tur aṭangin an inhnukdawk a, kuminah inelna an hmachhawn dawn tawh lo niin a lang.

March thla khan Birmingham-ah All England Open khelh a ni a, a hnu lamah erawh coronavirus vangin inelna a la awm leh tawh rih lo. Badminton World Federation (BWF) chuan October 13 aṭanga ṭan turin Denmark Open buatsaih a tum a ni.

London Olympic bronze medalist Saina chuan, "Denmark Open aṭangin ka inhnukdawk, tuna a lan dan chuan nakkum January thla a khelh tur Asian Tour aṭangin bul kan ṭan thar leh ang," tiin a sawi.

BWF hian ram leh ram inelna Thomas and Uber Cup pawh tun thla chhunga neih tur ni mah se nakkum atan a lo sawn tawh a, Asia ram inelna neih tur dang pathum pawh kuminah an khel dawn lo.

Saina bakah hian mipa singles world number 24 Kashyap pawh a inhnukdawk a, tun thla tir lam khan Rio Olympic silver medalist PV Sindhu pawhin hri leng vanga a inlan loh tur thu a lo sawi tawh.

Indian player zingah world number 1 hlui Kidambi Srikanth, rawlthar Lakshya Sen, Ajay Jayaram leh Subhankar Dey te chu Denmark Open-ah hian an inlan 

thung ang.