Mizoram cricket neitu Ramhlun Venglai

CYMA leh Cricket Association of Mizoram buatsaih 12th Inter Branch YMA Cricket Tournament champion chu Ramhlun Venglai an ni. Vanlalzuata kaihhruai RVL hian Durtlang hnehin a vawi ruk nan CYMA Cricket nomawi an chawi a, ielna zawnin vawi li an champion-na niin champion ngun ber leh champion zawn rei ber record an neihsa chu an belhchhah. Mizoram cricket neitu tihiala sawi theih an ni.

Ramhlun Venglaiin Mizoram cricket an awp a, final-ah pawh anmahni elpha ber tura ngaih Durtlang chu wicket sarihin an hneh. RVL captain Joseph Lalthankhuma'n final-ah 49 runs siamin man of the match-a thlan a ni a, champion-na kawnga player pawimawh bik a nih avangin player of the tournament leh best batsman-a thlan a ni bawk.

Over 16-na mangchhia!

Lammualah final khelh a ni a, entu pawh an chhe lo. Zing lamah khua ṭha mah se inkhelh ṭan meuh chuan khua a dur ṭan. DLS Method hman theih a nih avangin run rate ṭhat a pawimawh a, bat hmasak thlangtu Durtlang opener R. Lallawmzuala (1 run) leh captain Marty Lalrinhlua (12) te che ṭha tawk lo mah se Lalhruaizela leh Henry Lalsangzuala te an chet ṭhat avangin Durtlang beiseina sang hle.

Semifinal-a 59 runs siamtu Hruaizela'n pressure na zual su kiangin a indah dik chho a, Lalhriatrenga nen RVL bowler an chhaih buai hman viau. Over sarihna ringawta 19 runs an vaw chhuak chuan Durtlang phurna a pe nasa hman hle. Mahse, batter ṭha Joseph Lalthankhuma'n bowling pawh a thiam tho tih lantirin Hriatrenga (14) rawn vawm hlumin Durtlang an fimkhur leh phawt a ṭul.

Henry Lalsangzuala rawn lut a, Hruaizela nen an inkawp fuh hle. Over 15-ah Durtlangin wicket thum chauh hlohin 113 runs an siam a, target atan 160 chuang an siam theih chuan RVL tan chetsual theih a ni dawn. Mahse, over 16-ah Rodawngzela'n Durtlang thiampuipa Hruaizela (44 runs) a vawm hlum a, 43 runs siam tawh Henry Lalsangzuala a run out bawk. Durtlang tan over 16-na hi mangchhia a ni a, Hruaizela leh Henry te hmun ruak luah khat thei an awm tawh lo.

Durtlangin over khat leka batter ṭha pahnih an chân avangin an insiamrem thei tawh lo a, RVL bowler-te an chet ṭhat bawk avangin over 20-ah 142/7 runs chauh an siam thei a, target ṭha tak a ni lo. Chutihrualin bowler-te an chet ṭhat chuan chakpui theih chu a ni.

Thutlukna huaisen

RVL coach Vanlalzuata'n tualchhung cricket a hrechiang a, team ṭha zawk an ni tih a hriat ang bawkin vanduai ve thei an ni tih a hria. Hei vang hian final-ah team ṭha ber khelhtir a duh a, college exam vanga semifinal pawh khel thei lo Lalṭhakima chu pathumnaah a dah. Zuata chuan, "Thutlukna ka siam sual chuan mawh ka phur ang," tiin a player-te pawh a hrilh.

RVL opener C. Vanlalhruaia (17) leh Vanlalhruaitluanga (10) ten run tam an siam lo a, Ṭhakima'n coach rinna a tithlawn lo. Ramhlun Venglai chu dinhmun ṭhaa dahin ball 24 lekah 45 runs a vaw chhuak a, an thiampuipa Joseph Lalthankhuma'n team khaidingtu a nihzia a lantir bawk.

Chutihrualin Joseph hi a vannei tel ve bawk. Over 4.2-ah run nga lek a la siam a, Joseph hian Durtlang bowler H. Zothanchhunga ball vawm chu vaw sualin man nuam tawk ni mah se Durtlang fielder-in a thlauh a, ball chauh ni loin champion nomawi a thlauh ang hiala sawi theih a ni.

Joseph hi a chesual nawn duh tawh lo a, ball 34-ah 49 runs siamin a tawp thlengin a dam. Champion-na run pawh Joseph-a vuak a ni a, inside out hmanga six runs vuain a technique chu 'class' tak a ni. RVL-in over 5.4 dah bangin 146/3 runs an siam a, Durtlang lakah hnehna an chang.

Thawhrimna rah a thlum

CYMA Cricket hi Mizoram chhunga veng/khua cricket thiam ber teh nana ṭha ber a ni a, Ramhlun Venglai hi a thiam ber chu an ni. RVL hian Mizoram cricket thunun tur hian awmze neiin an thawkrim a, risk an la tel bawk. Kum 2003-a CYMA Cricket neih hmasak ber a nih khan final an lut a, Armed Veng lakah an vanduai. Kum 2007 khan RVL hi an champion chauh a, nomawi an chawi aṭanga kum khat hnuah academy mumal takin an kalpui.

Academy an kalpui ṭan hian BCCI hnuaiah CAM an la inziaklut lo a, cricket-ah sum a la awm lo. Mahse, RVL-in cricket an tuichilh a, BCCI hnuaia CAM intahluh hnuah phei chuan an thawhrim rah hi sum hmanga vur an ni. RVL captain Joseph-a ringawt hian cricket vangin cheng nuai 100 chuang a la lut tawh a, veng anga cricket hmanga sum hailut hnem ber an ni.

RVL-ah chuan cricket hi veng 'titi' a tling pha a, tun ṭumah pawh champion rinkai an ni chungin an inthlahdah lo. Coach Zuata chuan, "Carpet-ah hian kan khel ngai tawh lo a, CYMA thuchhuah kan hmuh khan chesual ve thei kan ni tih kan inhria. Ramhlun Sports Complex-ah carpet chungah training ṭha takin kan nei a, kan naute an thawkrim. Branch YMA-in min thlawp ṭha a, an chungah kan lawm takzet," tiin Vanglaini a hrilh a, inelna buatsaihtu CYMA leh CAM chungah lawmthu a sawi tel bawk.