Chawimawina pathum dawngtu Joseph

Ramhlun Venglai hian champion turin Sihphir, Tuithiang, Zemabawk, Luangmual leh Durtlang te an hneh a, nomawi an chawi theihna kawnga player pawimawh Joseph Lalthankhuma chu final-a man of the match-a thlan a nih bakah best batsman leh player of the tournament-a thlan a ni.

RVL captain Joseph chuan, "Kan champion theihna chhan chu Pathian vang a ni a, kan hruaitute, player-te leh min ṭawiawm tute vang a ni bawk. Mizoram cricket-ah chuan ṭawiawmtu nei ṭha ber kan ni a, anni tel lo chuan tun dinhmun hi kan thleng thei lo ang. Academy neih hi a pawimawh em em a, chumi lo hmu lawktu RVL Club hruaitute fak an phu hle, investment dik tak a ni. Player-te kan thawkrim a, squad a chhah bawk nen, tumah phunnawi leh vui pawh awm loin tournament kan khel tluan thei hi inlungrualna rah ni," tiin a sawi.

Inelnaah hian quarterfinal aṭangin man of the match thlan ṭan a ni a, Joseph hi final thlengin man of the match-a thlan a ni. RVL captain hian tun inelnaah 296 runs siamin a strike rate pawh 231.25 a tling pha a, average pawh 98.67 daih a ni. Tuithiang an hneh ṭumin an hneh awlsam deuh vangin a bat hman lo a, bat hman ngat se, a record a ṭha lehzual ang.

Best bowler-ah RVL spinner Vanlalrinzuala thlan a ni a, ani hi RVL aṭanga wicket la hnem ber niin match nga aṭangin wicket kua a la. RVL bowler dang Lalrinfela Zadeng (8 wickets) leh Dika Ralte (7) te aiin wicket a la hnem zawk.