City-in champion an hnaih zel

Manchester City chuan Premier League nomawi chawi an tum tih chu ṭawngkam mai ni lo, thiltih hmangin an lantir leh ta a, Inrinni zan khan Fulham chu khualmualah 4-0 in an sawp.

City tan Josko Gvardiol chuan goal hnih a khung a, Phil Foden leh Julian Alvarez (penalty) ten goal khat ve ve an khung bawk. Hun tawp thlengin goal dang a lut lo a, City an chak chiang.

Pep Guardiola naute an chak rual hian Liverpool tan champion beiseina a thamral nghal. Reds hian an hmabak match hnihah hnehna chang ve ve pawh ni se, City an um phak thei tawh lo a, an champion dawn lo chiang tawh.

Hetihlai hian City elpui ber Arsenal chu nizan khan Old Trafford-ah an leng a, he thu buatsaih a nih lai hian result kan hre hman lo - match hnih ve ve khelh tur la awmah point hnihin an inthlau mek.

Chak chiang City

Fulham khelmnualah inkhel ṭantirh aṭangin City-in inkhel an thunun nghal a, minute 13-naah defender Gvardiol chuan striker tih awma mawiin, chiang zetin hmahruaina goal a khung a, mikhual team hian goal dang erawh an khung lawk lo.

Goal dang lut loin chawlhlawk hman a ni a, minute 59-naah Foden a inlar. English player thiam bik hian a season duhawm hman chu chhunzawmin, an goal hnihna a khung a, 2-0 a ni.

Minute 71-naah Gvardiol bawk inlarin, goal thumna a khung a, chak tur a chiang tawh. Mahse, City-in an la duhtawk lo. Hun pek belhah Issa Diop chuan Julain Alvarez titluin penalty a chawi a, a yellow card pahnihna a hmuh tel avangin hnawhchhuah a ni bawk.

Hattrick siamna hun ṭha nei Gvardiol-a'n Alvarez a kian a, Argentine striker chuan penalty hi harsatna nei loin goal-ah a chantir a, 4-0 in Pep leh a naute an chak. City tan Erling Haaland chuan chance duhawm a nei ve bawk a, mahse, Norwegian striker ke hmui zan a ni lo.

An kutah

City boss Pep Guardiola chuan, "Player ṭha chuan boruak sang tak hnuaia inkhelh hi nuam an ti zel a ni. Ka player-te hian a hma pawhin boruak sangah an theihna an lo pholang tawh ṭhin a, tunah pawh a ni leh ta.

"Aston Villa laka Arsenal an tlawm khan ka duhthusam ka lo sawi daih tawh a, kan match tawp berah kan kuta engkim innghat chunga khelmual luh kan duh," a ti a, champion chu an kuta awm a nih avangin a lawm thu a sawi.

City chak rualin April thlatira Premier League hmahruaitu Liverpool champion beiseina a thamral zui a, Jurgen Klopp-a naute hi a nihna takah chuan Everton laka an tlawm khan an beiseina a thamral tawh tiin a sawi theih.

Klopp hian, "Table kan en thiam vek a, thil awmzia kan hrethiam vek. Keini tan champion tur chuan Manchester City leh Arsenal te an hmabak match-ah an tlawm vek a ngai a, chutiang chu a thlen theih ka ring lo," tiin kar hmasa khan a lo sawi tawh - zanin dar 12:30-ah Champions League khelh tum Aston Villa an lenchilh ang.