Chelsea an harh chhunzawm zel

Season tawp hnaih lamah Chelsea an vul - league match thum a zawna an chakna ni turin Nottingham Forest chu 3-2 in an hneh a, season thara Europa League khelh phak an sawi ri ve leh ta.

Blues hian minute riatna lekah Mykhailo Mudryk hmangin goal hmahruai an khung a, mahse, Forest-in first half-ah Willy Boly hmanga si phurh sutin, Callum Hudson-Odoi chuan a club hlui lakah hmahruaina goal a khung bawk.

London club hi an talbuai zui dawn emaw tih laiin huaisen takin an bei let a, minute 80 hnu lamah Raheem Sterling leh Nicolas Jackson ten goal khat ve ve khung ve lehin, 3-2 in an chak daih.

Premier League table-ah pangana leh paruknaten Europa League an khel ṭhin a, Blues hi table-ah pasarihna ni mekin, parukna Newcastle United nen an point hmuh zat a inang ve ve a, match hnih khelh tur an la hmabak bawk.

Magpies hmabak pahnih hi Manchester United leh Brentford an ni a, Chelsea-in Brighton & Hove Albion leh Bournemouth an la hmachhawn dawn thung.

Chelsea boss Mauricio Pochettino chuan, "A tirah game kan thunun a, mahse, ṭha lo takin goal kan chhuah zui. Second half kha a harsa em em a, mahse, kan chak thei hram a ni. A pawimawh ber chu point thum kan hlawh chhuak hi a ni a, Tottenham Hotspur leh West Ham-a kan khelh dan erawh kan phak ta lo," a ti.

Blues laka tlawm Forest hian Premier League him turin point khat an la mamawh a, mahse, West Ham laka Luton Town tlawm vanga an hun ṭha neih an bawhpelh - match khat khelh tur an la nei a, Burnley an hmachhawn ang.