Tlai dar 2:00-ah MPL Playoff

Mizoram Premier League Season 11 khel tur team pasarih a chiang tawh a, hmun ruak pakhat la awm chu playoff hmangin zawn a ni dawn. Vawiin chawhnu dar 2:00 hian MPL Qualifier-a pahnihna SYS FC leh MPL10 pasarihna Project Veng FC ten playoff first leg an khel ang.

Playoff-ah hian away goal rule dan a la awm a, hei hian inkhelah nghawng lian tak a nei thei dawn. First leg hi SYS FC tan home match a ni dawn a, second leg hi Proeject Veng FC tan home match a ni ang.

MPL dan a fuh tawk lohna a awm niin a lang a, Europe inelna sang zawk Champions League-ah pawh an paih bo tawh dan hi, home leh away pawh awm mumal lohna MPL-ah hian paih bo a ṭha hle.

Tun ṭumah erawh danah a awm miau avangin away goal rule hman a ni dawn a, team pahnih game plan-ah a awm tel a ṭul. Away goal rule en hnu pawha an inhnehtawk a nih chuan penalty hmanga chak zawk zawn tur a ni.

SYS hian match fitness an nei ṭha a, qualifier-ah match thum an khelh tawh avangin inelna hmachhawn turin an inpeih zawk. Chutihrualin Project Veng erawh MPL club an ni a, chak tura rinkai zawk a ni.

Mahse, Kolasib club hian MPL-a an player pawimawh ṭhenkhat an chân tawh a, player lak belh nei bawk mah se MPL10 lai aiin an ṭha tawh lo zawk. Hei vang hian SYS FC lakah Project Veng FC hi dan sang nghal ngawt a rem lo.