Havertz-a'n bul a ṭan dawn - Low

Germany-in zanin dar 12:15 hian friendly match-ah Turkey an mikhual dawn a, hemi zawh hian Ukraine leh Switzerland nen friendly match an khel leh ang. 

Joachim Low hote hian FIFA World Cup 2014 a an champion hnuah result ṭha neih an harsat a, UEFA Nations League-ah phei chuan chak an la nei lo. Germany boss Low hian World Cup 2018 a an mualpho zawhah Thomas Muller, Jerome Boateng leh Mats Hummels te an koh tawh loh tur thu a sawi a, pressure a ngah phah hle.

Turkey nena an inkhelh turah hian Joachim Low-a'n bul ṭan tur ṭhenkhat a sawi lawk a, chung zingah chuan Arsenal keeper Bernd Leno, Chelsea midfielder Kai Havertz leh PSG midfielder Julian Draxler leh Borussia Dortmund midfielder Julian Brandt pawh an tel.

Low chuan, "Kai Havertz hi game chhunga team ti ṭha tu a ni a, Germany tan pawh a inlan nual tawh a, Turkey lakah pawh bul a ṭan ang," tiin Chelsea player thar chungchang a sawi. 

London club a Havertz-a khelhpui Timo Werner erawh Covid-19 nena rinhlelh tura a hritlan avangin friendly match-ah hian a inlan lo ang a, match hnih dangah erawh a test result a zir a ni ang.

Chelsea midfielder Havertz chuan, "Match zawng zawngah ka khelh tawpna tur ang maiin ka theihna zawng zawng ka chhuah ṭhin. Chelsea-ah pre season ka neih loh avangin a harsa a, chumi piah lamah Bundesliga leh Premier Leageu chu a danglam hle. Chutihrualin ka khelh tawh chinah ka khel chhe bik lo a, hmasawnna tur a tam thung," tiin a sawi.