Burnley kan thlah ta

Vincent Kompany enkawlna hnuaia Championship nomawi chawi a, tun season Premier League khel tura inpetkai Burnley tan English top flight league a hautak hret a, Inrinni zan khan Tottenham Hotspur lakah 2-1 a tlawmin, Championship lamah an tla leh ta.

Chak mamawh Burnley hian Jacob Bruun Larsen hmangin goal hmahruai khung mah se, Spurs hian Pedro Porro leh Micky van de Ven hmanga goal khungin, 2-1 in hnehna an chang a, match khat khelh tur la nei chungin Burnley tan inhumhim theih a ni tawh lo.

Hetihlai hian Spurs tana Champions League khelh beiseina erawh a la nung ve zel - match hnih chiah khelh tur awm tawhah point liin Aston Villa an la phak lo mek a, mahse, Villa hian Liverpool leh tun hnaia che ṭha Crystal Palace an hmachhawn dawn avangin Spurs tan beisei tur a la awm.

Mahse, Spurs hmachhawn turte hi Manchester City leh Sheffield United an ni a, Villa lo chesual pawh ni se, champion tum City laka chak a harsa dawn - engkim a chiang ṭep e.