Goal li nena champion lawmtu Real Madrid

Real Madrid-in La Liga nomawi an chawi dawn tih an chian hnua an league match hmasa berah Granada chu 4-0 in an sawp a, Champions League final lut hlim team hi tunlai chu an 'puja' a fuh hle.

Real tan Brahim Díaz chuan goal hnih khungin, Fran García leh Arda Güler ten goal khat ve ve an khung bawk a, mualneitu Granada lamin a chhanletna tur an neih loh avangin Real Madrid an chak chiang.

Season thara Champions League khel tur Girona chuan khualmualah 2-2 in Alaves an inhnehtawkpui a, Villarreal khelmualah Sevilla chu 3-2 in an tlawm thung

A awlsam

Real boss Carlo Ancelotti-a'n Champions League semifinal khel chau player engemawzat a hahdamtir a, Dani Carvajal, Jude Bellingham, Nacho Fernandez, Vinícius Júnior, Toni Kroos, Rodrygo leh Federico Valverde ten bench lamah hun an hmang vek.

Mahse, Granada mualah hnehna chang turin Real-in harsatna an tawk chuang lo. Minute 38-naah Fran García chuan goal hmahruai khungin, first half hun pek belhah Guler chuan a belhchhah bawk.

Kum 19 mi Guler hian nipui transfer lai khan Fenerbahçe aṭangin Real hi a zawm a, hliam vangin talbuai mah se, a khelh chhunah player theihna nei sang a ni, tih hmuh turin a awm ṭhin - inelna hrang hrangah match 10 khelin goal thum a khung der tawh.

A hming Diaz

Real-in 2-0 in chawlhlawk an hmang a, second half-ah Brahim Diaz chuan goal hnih a khung ve leh bawk. Kum 24 mi Diaz hian season thum zet AC Milan-ah loan-a hun a hman hnuin, Santiago Bernabeu-ah a kir a, bul ṭan nei tam lo mah se a ti ṭha hle.

Spain tan vawi khat chiah a inlan hnua, khelh tam beiseia Morocco tana international football khelh thlangtu Diaz hian tun season inelna hrang hrangah Real tan match 43 khelin goal 12 a khung tling ta a, assist vawi ruk a nei.

Inrinni zanah pawh bul ṭanin, Real chu hnehna hlado a chhampui a, Madrid khaw club hian league match 29 a zawnin tlawm an nei ta lo a, 1989/90 season-a John Toshack hoa league match 28 an kal tluan hnua, league-a tlawm nei loa an kal rei ber record an siam.

A chhehvel

Champion chiang tawh Real-in Granada chungah zahngaihna an lantir lo a, Granada hi second division-ah an tla zui. Granada elpui Real Mallorca chuan inkhel dangah 1-0 in Las Palmas an hneh a, Real laka tlawm Granada an tlak phah.

La Liga aṭang hian Granada leh Almeria chu tla tawh an ni a, 18-na Cadiz pawh an dinhmun a him lo hle. Hetihlai hian kar hmasa lawka an dinhmun chingfeltu Sevilla an chak lo zui a, Villarreal an ngam lo.

Sevilla tan hian Youssef En-Nesyri chuan goal hnih khung mah se, Villarreal tan Alexander Sørloth chuan goal hnih khungin, Yerson Mosquera chuan goal khat a khung ve leh a, 3-2 in an chak. Zirtawpni zan inkhelah Girona-in Eric García leh Yangel Herrera hmangin vawi hnih ngawt hma an hruai a, mahse, Jon Guridi goal hnih hmanga Alaves-in chhangletin, 2-2 in inkhel a tawp.