PSG mangṭhatu Mbappe

13th May, 2024

Thawm a awm a, amah leh club lam erawh an reh reng thung - tunah erawh Kylian Mbappe ngeiin tun season tawp ruala Paris Saint Germain a chhuahsan tur thu a tichiang ta.

France captain Mbappe hian tun season tawp thleng daih chauh hi PSG tan contract a nei tawh a, pawh sei a tum lem lo. Kumin January thla aṭang khan a duh zawng club a be thei tawh a, dan ang thlapin man nei loin a chhuak dawn.

Kum 25 mi Mbappe chuan, "Tun hma deuh khan a hun dik takah ka ṭawng chhuah tur thu ka sawi tawh a, tun hi a hun chu a ni. Paris Saint Germain tana ka hun hnuhnung chu kumin hi a ni ang.

"Tun aṭanga hun rei loteah hian Paris club nena kan hringnun zinkawng chu a tawp dawn a ni," a ti. Khawthlang chanchinbu mite chuan a chhuah chian tur thu hi kumin February thla khan an lo ziak tawh a ni.

PSG tana goal 255 khungtu, club tana goal khung tam ber ni bawk hian nizan khan Toulouse a hmachhawn; PSG jersey ha chunga anmahni khelmual Parc des Princes-a a inlan hnuhnung ber a ni ang.

Paris khawpuia piang leh seilian Mbappe hian kum 2017 August thla khan AS Monaco aṭangin PSG hi pound maktaduai 165.7 zetin a zawm a, a club tan hian nomawi eng emaw zat chawi mah se Champions League erawh a lakpui ta lo.

Mbappe chuan, "France rama club lian ber, khawvel huap pawha team ṭha berte zinga miah ka khel a, tawnthu leh sulhnu chi hrang hrang ka ngah hle. Ka chhuah tur thu sawi pawh hi harsa ka ti," tiin a sawi.

A chhuak dawn tih a sawi rual hian, khawi lam nge a pan ang tih chu zawhna lian tak a ni nghal. Tun hma aṭangin Mbappe hi Real Madrid nen sawi zawm a ni a, tunah pawh Spanish club hi a pan a rinawm ber.

Mi ṭhenkhat chuan Mbappe leh Real Madrid hi an inbe fel tawh niin an sawi a, a contract leh hlawh tur zat thlengin an tarlang tawh. Mahse, anmahni ngeiin an puan hma chuan a hma hun hi an inrinsiak leh rih dawn a ni.

PSG tana a hun hnuhnung berah Mbappe hian Ligue 1 nomawi a lakpui a, season khuhhawn nan khan Super Cup an lak tawh bakah French Cup final khelh hmabak an la nei bawk - nomawi pathum nena season khar thei dinhmunah a ding.