National referee seminar an zo fel

National Taekwondo Referee Seminar chu Inrinni khan MATA Hall, Republic Vengthlangah tluang taka zawh fel a ni.

National Referee Seminar hi Taekwondo Federation of India hian Aizawlah vawi nga a buataihna niin, tun ṭum hi kum 2016 hnua neih lehna hmasa ber a ni thung.

State hrang hrangah buatsaih mek niin Aizawl hi chung zinga pakhat chu a ni. Mizoram leh a chhehvel state tana buatsaih a ni a, Seminar tel mi 20 awmin world taekwondo competition rules thar ber an zirho hnuah practical leh theory-in an exam a, ṭha takin an paltlang thei vek a ni.

Seminar leh exam hi Taekwondo Federation of India technical committee member master Joseph Thansanga, international referee ni bawk chuan zirtirna pein federation kalphung angin exam a endik nghal bawk.

National referee exam tur hian state referee, world taekwondo black belt, leh kum 18 chung lam an ni tur a ni a. MATA hian National Referee qualify 45 leh international referee pathum a nei mek a ni.