Italian Open-ah Nadal a chak lo

Rafael Nadal tan thil a awlsam thei rih lo - a vawi 11 nana Italian Open nomawi lak a tumna chu a thlawn ta. World number 9 Hubert Hurkacz hneh loin Nadal zinkawng hi second round-ah a tawp.

Inrinni zan Center Court-a inkhelah Nadal hi a che hleithei lo, darkar khat leh minute 33 chhungin 6-1, 6-3 in a chak lo, a khingpui service na leh ball vuak na tak chu a hmachhawn hleithei lo a ni.

Grand Slam vawi 22 champion tawh Nadal hi May 26 aṭanga khelh tur French Open-ah inlan zui tura beisei a ni a, mahse tunah chuan a hma hun engmah a sawi chiang thei rih lo thung.

Nadal chuan, "Tun dinhmunah chuan thutlukna ka la siam lo. Ka duhthusam leh suangtuahnaah chuan a ṭha thei ang bera Roland Garros khelh a ni, mahse ka taksa dinhmun ka ngaihchan tel zel a ngai," a ti.

Mipa singles inkhel dangah Cameron Norrie chuan Spanish player Jaume Munar lakah 6-3, 1-6, 6-3 in hnehna a chang a, a match lehpekah chuan clay court-a inkhel thiam tak mai Stefanos Tsitsipas a hmachhawn leh ang.

Hmeichhe singles lam pawh a hmuhnawm - world number 1 Iga Swiatek chuan last 16 a lut fel tawh, a khingpui Yulia Putintseva lakah 6-3, 6-4 in a chak a ni. Set hnihnaah hian 4-1 in hniam hman mah se, game hnuhnung panga a la fai vek.

Naomi Osaka pawhin beisei phak baka ṭhain a khel mek. Japanese star hian Daria Kasatkina chu 6-3, 6-3 in a hneh a, inelna neih laiah set a la hloh miah lo - clay court hi inkhelh a harsatna hmun ni mah se kuminah a khel ṭha rih hle.