Euro 2020 khel tur zaninah an zawng dawn

Europe ramte tana football inelna sang ber European Championship chu Covid-19 vangin nakkumah khelh a ni dawn a, natna ṭihbaiawm tak avang hian playoff pawh khelh zawh a la ni lo. Team 16 tan hmun ruak pali a la awm a, zanin hian a thawhkhatna neih a ni ang a, November thlaah Euro 2020 khel tur a hriat kim ang.

European Championship hi nakkum 2021-ah khelh ni dawn chauh mah se Euro 2020 hming a pu chhunzawm dawn. Ram 24 an inlan dawn a, ram 20 chu inelna hmachhawn turin an tling tawh. Hmunruak pali hi Euro 2020 khel tura inpetling lo, amaherawhchu 2018–19 UEFA Nations League a che ṭhate aṭanga thlan tur a ni.

Path A hi League A aṭanga thlan an ni a, team ṭha awmkhawmna group a nih avangin Iceland chiah an bang. Team pali tur a nih avangin League B-ah thlan tur dang an awm tih en phawt a ni a, amaherawhchu League B-ah team pali chiah an ban avangin thlan theih a ni lo.

League B aṭangin Euro 2020 khel tura tling lo. Bosnia and Herzegovina, Northern Ireland, Slovakia leh Ireland ten Path B aṭanga hmunruak pakhat hi an inchuh ang.

Iceland elpui tur hi League C-ah zawn leh a ni a, team chuang an awm chiah. League C-a che ṭha pali Norway, Serbia, Scotland leh Israel ten Path C hmunruak pakhat an inchuh dawn. Heng ram pali hnuaia awm ram pathum Bulgaria, Hungary leh Romania te an vannei a, Path A-a hmunruak pathum an hnawh khat a, Euro 2020 khelhna chance an nei.

League D aṭangin Euro 2020 khel tura inpetling zo an awm lo a, hemi a nih avang hian League D group tina hmahruaitu Georgia, Belarus, North Macedonia leh Kosovo ten hmunruak pakhat hi an inchuh dawn a ni.

Playoff hi tun hmaa Euro Champion-ship nen a danglam hlak a, tun ṭumah erawh friendly match tam zawk thlakna tura buatsaih Nations League thlak nan an hmang.

Match tin hi minute 90 chhunga an inhnehtawk a nih chuan extra time minute 30 khelh a ni ang a, chak zawk an la awm lo a nih chuan penalty shootout hmangin chak zawk an zawng ang.

UEFA Executive Committee-in December 4, 2019 a Nyon, Switzerland-a an rel tawh angin playoff-ah hian video assistant referee system (VAR) hman a ni dawn.

Iceland coach Erik Hamrén chuan, "Playoff hi knockout final ang mai a ni dawn. Match khat chauh khelh a ni dawn a, chutihrualin mual neitu zawk tan chakna chance a ṭha hret ang a, kar thlirnaah chuan 55-45 a ni," tiin a sawi a, mualneitu tur an nih avangin an dinhmun a ṭha hretah a ngai.

Iceland hian an mualah Romania an mikhual dawn a, inkhel dangah Bulgaria leh Hungary te an inkhel bawk ang. Mualneitu tur Bulgaria-in Euro an khelh hnuhnun ber chu Euro 2004 daih kha a ni a, qualifying round-ah vawi khat chauh an chak. Bulgaria hi an tling hlauh a nih chuan Nations League vanneihpuitu tur an ni ang.

Bosnia and Herzegovina-in inelna hnuhnung pahnihah playoff hi ṭum hnih an paltlang thei tawh lo. An khingpui tur Northern Ireland nen hian goal venhim an harsat a, NI hian khualmuala an match hnuhnung paliah goal 12 zet an chhuah.

Slovakia leh Republic of Ireland te an inkhel bawk dawn. Rep of Ireland hi playoff-a inlan ngun ber an ni a, match hnunung pali aṭangin vawi hnih an chak. Playoff bikah Rep of Ireland hian khualmualah chak loh an la nei lo a, Slovakia erawhin an muala match hnuhnung pangaah Azerbaijan chiah an hneh.

Norway-in Oslo-ah Serbia an mikhual dawn a, Path C ni mah se Norway hi Borussia Dortmund striker Erling Haaland awmna a nih avangin ngaihven a hlawh ang. Haaland hi Euro 2020 ti hlu thei tur striker a ni a, chutihrualin Serbia hian Aleksandar Mitrovic an kawl. Fulham striker hian ram tan match hnuhnung pakuaah goal 12 a khung.

Scotland-in Israel an mikhual dawn. Scotland hi Andrew Robertson, Kieran Tierney leh Scott McTominay te awmna a ni a, ram pahnih September 5 khan 1-1 in an inhnehtawk.

Nations League vanneih pui ber tur chu Path D-a awmte hi an ni a, an thiamna thlir chuan Euro 2020 khel turin an ṭha tawk lo. Amaherawhchu Georgia, Belarus, North Macedonia leh Kosovo zinga pakhatin inelna ngaihhlut hi an khel dawn.

Kosovo hian September 2015 khan UEFA leh FIFA hnuaiah an iniziak lut chauh. World Cup 2018 khel turin an tling zo lo a, Euro 2020 hi inelna lian tham an khelh theih hmasak ber a ni. 

•    12 June - 12 July 2020 ah khelh tur ni mah se Covid-19 avangin a hun an sawn.

•    1 June - 11 July 2021 ah khelh a ni dawn. 

•    Inelna hi nakkum 2021 ni mah se a hming hi Euro 2020 a ni chhunzawm dawn.

•    European Championship inelna hi kum 60 tlinna tur a ni a, khawpui 12-ah khelh a ni dawn.

•    Ram 24 khel tur aṭangin ram 20 khel tur a hriat tawh.

•     Group A : Turkey, Italy, Wales & Switzerland

•    Group B : Denmark, Finland, Belgium & Russia

•    Group C : Netherlands, Ukraine, Austria & Path A or D winner

•    Group D : England, Croatia, Czech Republic & Path C winner

•    Group E : Spain, Sweden, Poland, Path B winner

•    Group F : Portugal, France, Germany & Path A or D winner

*    Bulgaria, Hungary emaw Iceland te Path A aṭangin an tlang a nih chuan group F-ah an awm ang. Path D (Georgia,Belarus, North Macedonia, Kosovo) a pakhatna hi group C-ah an awm thung ang.

*    Path A-ah Romania pakhatna an nih chuan group C-ah an awm ang a, Path D-a pakhatna chu group F-ah an awm ang.