Jeje Jeje Jeje - Lajong beisei a tawp?

Jeje Lalpekhlua'n Pa-thian-ni zan khan Shillong Lajong lamah hattrick a siam a, Mohun Bagan-in Barasat Stadium-ah North East club Lajong chu 5-0 in Federation Cup semifinal first leg-ah an sawp.

Lajong hian May 14, Inrinni zan hian JN Stadium, Shillong-ah Mariners hi an mikhual dawn a, Thangboi Singto hoten khualmualah goal an khung loh bawk avangin Sanjoy Sen hoten final an lut chiangah a ngaih theih.

Jeje Zan

Shillong Lajong-in Fede-ration Cup aṭanga East Bengal an petchhuah avangin Mohun Bagan lakah beiseina sang tak an nei a, mah se Kolkata club lianin Jeje an kawl a, Mizo striker cheṭha lai an dang zo lo.

Bagan-in goal khung lawk lo mah se minute 40-naah Lajong tlarhnungin Sony Norde-a'n dang zo lo a, Haiti winger thawhrah hi Jeje-a'n a khung. Second half-ah Jeje hian Cornell Glen-a thawhrah ṭum hnih (51',55') a seng leh a, kumin Federation Cup-a hattrick siam hmasa ber a ni.

Jeje ropui zan hian Bikramjit Singh (45') leh substitute Azharuddin Mallick (87') ten Mariners tan goal khat ve ve an khung bawk. Hnahthial tlangval hian goal ropui khung lo mah se striker ṭha zia a chhuah a, a awmna hmun tur a hunah tak a thlen ṭhin avangin Lajong tan dan rual a ni lo.

A nu tan

Nute niah Jeje-a'n a nu tan a hattrick siam a hlan. Mariners striker chuan, "Hun rei tak hattrick ka siam loh hnua siam leh chu a lawmawm duh khawp mai. Kan duh ber chu chak a ni a, goal ka khung hi chu a lawmawmna belhchhahtu a ni. Ka hattrick hi ka nu tan ka hlan," tiin Vanglaini palai a hrilh.

Shillong-a an inkhelh hmabak sawiin Jeje chuan, "Football-ah chuan thilmak a thleng fo a, kan la chak chiang lo," tiin final an la luh chian loh thu a sawi.

Mizo striker hian I League-ah Aizawl FC an hmachhawn ṭumin a khel thei lo ve ve a, Federation Cup final an thleng a nih chuan Mizo club ngei hmachhawn a châk thu a sawi tel bawk.

Mariners hian AFC Cup Group G-ah hmahruaitu ni chungin knockout stage an thleng tawh a, April 11 zan hian South China nen group match hnuhnung ber an khel ang.

Hattrick Hero

Federation Cup-a hattrick a siam avangin Jeje hi top scorer ni turin a dinhmun a ṭha a, tun inelnaah hian match thum khelh tawhah goal ruk a khung.

Mizo tlangval hnaih bertu chu Aizawl FC striker goal thum khungtu Joel Sunday a ni.

Hnahthial tlangval hian Pailan Arrows tana a khelh laiin kum 2011 khan I League-ah Air India leh Mohun Bagan an khelh ṭumin hattrick a lo siam tawh a, Indian player zinga I League-a hattrick siam tam ber a ni.

Jeje Vs Chhetri

Sunil Chhetri hi Indian striker zingah chuan a langsar bera a, tun hnaiah erawh goal hmangin Jeje hian Bengaluru captain hi a rawn el chho mek. Tun hnaia club leh ram inelna thlir let chuan Jeje-a record a ṭha zawk a, Hnahthial tlangval hian goal 26 a khung laiin Chhetri-a'n goal 21 a khung.

FPAI Indian Player of the Year atana thlan thar Jeje hian chawimawina dawn a phu tih a lantir zel a, Fed Cup match zawng zawngah a pet goal vek a, Mizoram aṭanga inzir chhuak Jeje hi tun dinhmunah chuan India ram puma pet goal thei ber a ni.