Murray hnehin Djokovic-a'n Nadal a khum

Novak Djokovic chuan champion lai Andy Murray hnehin Mutua Madrid Open title a la a, ATP World Tour Masters 1000 title 29 a lakna chiah niin Rafael Nadal aiin vawi khatin a champion tam zawk.

Pathianni zana final khelhah Djokovic hian darkar hnih leh minute ruk chhungin Murray lakah 6-2, 3-6, 6-3 in hnehna a chang. Serbian thiampuipa hian Tennis Masters 1000 tournament hnuhnung 14-ah ṭum 10 zet a champion.

Madrid Open khelh hma khan Nadal leh Djokovic te hian ATP Masters 1000 title 28 ve ve an la tawh a, tunah chuan world number 1 hi a chhungnung ta zawk a ni.

Djokovic a lian

Britain star Murray hian kumina Grand Slam khelh hmasak ber Australian Open final-ah Djokovic hi a hneh lo tawh bawk a, tun hnai an intawn hnuhnung vawi 13-ah ṭum 12 zet a hneh lo bawk.

World number 1 Djo-kovic hian season hmasa khan Grand Slam pali awm zinga pathum Australian Open, Wimble-don leh US Open-ah te a champion. ATP ranking-a a sang zual 10 a hmachhawn hnuhnung 15-ah hnehna a chang vek hial a ni!

ATP Masters 1000 title vawi 29 lo la tawh Bjorn Borg leh Pete Sampras te record chu Djokovic hian a nihrual ve chiah a ni.

ATP ranking chhuak thara number 3 ni tawh tur Murray chuan, "Khaw-vela ṭha ber nen kan inhmachhawn a nih chuan rilru leh taksa tih paukhauh a ngai hle, mahse chuti chung pawha a chak lo zawka ka la ṭang hi chu hriatthiam a har hle. Mahse, clay court-ah Rafa ka hneh thei tawh a, Novak nen kan inthlauhna a tlak hniam zel avangin ka tan lawmna tur a awm tho," tiin a sawi.