Atletico an tawlhthlu; Real leh Barca inum zel
La Liga-ah match khat chiah khelh tur a awm tawh a, champion tum pathum zingah Atletico Madrid an chak loh laiin Barcelona leh Real Madrid-in an khing-pui ve ve an hneh - Atletico tan cham-pion beiseina a bo chhunzawm nghal.
Pathianni zan La Liga inkhelah Atletico Madrid hian beisei loh takin table mawngphaha awm Levante chu 1-2 in an hneh lo a, Barcelona-in 5-0 a Espanyol sawpin Real chuan an mikhual Valencia 3-2 in an hneh bawk.
Atletico a pawi
Pathianni zan La Liga match khelh hma zawngin Atkletico-in pakhatna Barcelona point hmuh zat an hmu a, Catalan club aia an hniamna chu head-to-head ah chiah a nih avangin champion beiseina an la nei.
Levante khelmuala inkhelah rin ang ngeiin Atletico-in goal an khung hmasa zawk a, Champions League final-a inlan tur team hian minute 2-na lekah Fernando Torres hmangin an hmahruaina goal an khung.
Mahse, relegate chiang tawh Levante-in an league match hnuhnung pali a goal chhuah miah lo team lakah awlsam taka tlawm an tum lo. Minute 30-naah Victor Casadesus chuan an si phurh sutna goal a khung a, minute 90-naah Giuseppe Rossi chuan chakna goal khung leh bawkin Atletico an hawihai.
Central defender Diego Godin leh club top scorer Antoine Griezmann tel loa khel Atletico tan La Liga-ah champion a beiseiawm tawh lo. Hmahruaitu Barcelona leh Real Madrid hi match khat khelh an la hmabakah chak lo ve ve pawh ni se head-to-head ah team pahnih hi an phak loh ve ve avangin an champion thei tawh lo.
Atletico manager Diego Simeone chuan an chak loh vanga a hnual loh thu sawiin, "Ka player-te hnenah an hnathawh vanga ka chhuan thu ka hrilh a ni. Season ropui tak kan hmang a, Real Madrid leh Barcelona-te nena kan in um thei hi a ropui a ni," tiin a naute a chhuang thiam hle.
Arbeloa thlahna inkhel
Season tawp ruala Real Madrid chhuahsan tur defender Alvaro Arbeloa-a'n a club hmangaih Real tana Santiago Bernabeu-a a match hnuhnung ber Pathianni zan khan a khel a, Spanish defender thlahna inkhelah Real hian Valencia chu 3-2 a hnehin La Liga nomawi chawi an beisei chhunzawm zel.
Hliam damkawr Cristiano Ronaldo chuan Real tan goal hnih a khung bakah amah ang thoa inhliam dam hlim Karim Benzema chuan goal khat dang a khung ve bawk a, Valencia tana Rodrigo leh Andre Gomes-te goal khungin awmzia a nei thui lo. Rodrigo hi hun tawp nan minute 7 chiah a awm tawh tihin hnawhchhuah a ni bawk.
La Liga match khat chiah khelh tur awm tawhah Real Madrid-in Barcelona an phak lohna chu point khat chiah ni mah se nomawi chawi tur chuan Catalan club tawlh thluk hun an nghah tel a ngai ang.
Real-a kum sarih a cham chhunga La Liga, Champions League, Club World Cup leh Copa del Rey (2) nomawi chawi tawhtu defender Arbeloa chuan an la beidawn loh thu sawiin, "Barcelona hi chesual thei an nih avangin kan la beidawng lo a, a tawp thlengin nomawi chawi kan beisei ang," tiin an beiseina a la thih loh thu a sawi.
Liverpool defender hlui chuan a vawi hnih nana Real a chhuahsan tur chungchang sawilang nghalin, "Real hi ka la rawn tlawh fo ṭhin ang. Mahse, Spain-ah chuan Real Madrid kawr lo hi chu ka ha thei lo," tiin ram pawn club a zawm tur thu a sawi nghal.
Barca an vul
Champions League aṭangin pet chhuah ni mah se La Liga lamah erawh Barcelona-in nomawi thlauh an tum lo a, Pathianni zan khan an mikhual Espanyol lakah hawihhawmna lantir miah loin 5-0 in an chak.
Barcelona tan Lionel Messi chuan minute 8-naah freekick ropui hmangin goal hmahruai a khung a, Luis Suarez-a'n goal hniha a chhunzawm hnuah Rafinha leh Neymar-ten goal khat ve ve khung bawkin mikhual team tan tih theih a tam lo.
Catalan club tan La Liga nomawi chawi turin match khat khelh an la hmabakah Granada hneh a tawk a, Luis Enrique-a naute tan La Liga nomawi chawi turin an kutah engkim a innghat.
Barcelona manager Luis Enrique chuan, "Kan match hnuhnung berah league nomawi chawi tura ṭha taka kan khelh theih ka beisei. League match 37 chhung rim taka kan lo thawh tawhna kha match khata kan khelh ṭhat hmangin kan chhawr dawn leh dawn loh a lang ang. Real pawh keini ang thoa khualmuala an match hnuhnung ber khel tur an nih avangin boruak a hniam thei lo. Lawmman chu kan hmaah chhawpin a awm a, he lawmman hi chona min pe turin a ropui tawk a ni," tiin league nomawi chawi ngei an tum thu a sawi.
Goal khung hnem
Season danga La Liga top scorer nih inchuha inum ṭhin chu Lionel Messi leh Cristiano Ronaldo an ni a, tun season-ah erawh Messi inhliam vangin a dan a dang thung.
Luis Suarez chuan goal 37 khungin top scorer ni turin a dinhmun a ṭha ber a, a hnuaiah hian goal 33 khungtu Cristiano Ronaldo a awm a. Pathumna Lionel messi chuan goal 26 a khung tawh thung.
Liverpool striker hlui Suarez hian league match bikah vawi 34 inlanin goal 37 a khung a, inelna hrang hrangah vawi 51 inlanin goal 56 a khung tawh!
Ronaldo-a'n tun season league match-ah bik vawi 35 khelmual chhung-ah a hmel lanin goal 33 a khung a, inelna hrang hrangah vawi 46 inlanin goal 49 a khung tawh bawk.
Lionel Messi-a'n season dang phak lo mah se a ropuina sawi nep theih a ni chuang lo. Argentina captain hian league match 32 a khelhah goal 26 khungin inelna hrang hranga match 47 a inlanah goal 41 a khung - hliam vanga buai chunga a record hi a nep lo.