Svitolina hnehtu Podoroska

Hmeichhe tennis world number 131 Nadia Podoroska chuan seeded pathumna Elina Svitolina hnehin French Open semifinal a lut a, hnehna a chan hnuah mumang rama a chen mekna aṭangin harh chhuah rih loh a duh thu a sawi.

Inelna neih ṭan hma kha chuan Podoroska hian mi hriat a hlawh lo a, rinkai zingah pawh a tel phak lo. Mahse mak tak maiin beisei aiin a khel ṭha a, quarterfinal-ah pawh chak lo zawk tura ngaih ni mah se Svitolina hi 6-2, 6-4 in a hneh.

Argentine nula hian zaninah semifinal a khel chhunzawm nghal dawn, amah ang bawka seeded chang phak lo Iga Swiatek a hmachhawn ang. Swiatek hian inkhel dangah Italian player Martina Trevisan chu 6-3, 6-1 in a lo hneh ve thung a ni.

Kum 23 mi Podoroska hi 2018 khan world ranking-ah 508-na daih a ni a, a ranking a hniam avang hian tournament lian pawh a khel phak mumal lo. Zawi muangin hma a sawn zel a, tunah chuan khawvel hmaah a theihna a pho chhuak ta.

Podoroska chuan, "Thu a sawi mai pawh a har, mumang ramah ka cheng mek a, he mumang aṭang hian harh chhuah ka duh lo," tiin a thlen china lungawi mai loin chak zel a duh thu a sawi chhuak.

French Open khelh hma khan Podoroska-i'n tennis a khelh aṭanga a lawmman dawn zawng zawng chu £233,009 (Rs 2,20,58,109) a ni, Paris khawpuiah hian semifinal a thlen avang chauh hian £387,288 (Rs 3,66,56,719) chu a dawng dawn tih a chiang tawh a, final a lut a nih chuan a la pung viau bawk ang.