MotoGP Le Mans-ah Lorenzo a chungnung

Pathiannia tlan zawh tak French Grand Prix-ah Jorge Lorenzo chuan hnehna changin MotoGP rider championship-ah hmahruaitu a ni leh ta.

Le Mans-ah champion lai Lorenzo hian pole position aṭanga bul ṭanin a tawp thlengin harsatna a tawk lo a tih theih. Intlansiak ṭantirh lamah Ducati rider Andrea Dovizioso chuan Lorenzo hi hnaih ve deuh mah se Yamaha rider hian lap 10 an tlan chuan second 2.7 zetin hma a hruai fal tawh.

Lap 28 an tlan meuh chuan Lorenzo hian a teammate Valentino Rossi lakah 10.654 second zeta hmahruai fal tawhin hnehna a chang chiang hle. Suzuki rider Maverick Vinales chu pathumnaah thlengin Marc Marquez erawhin beisei a phak lo thung. Honda rider Marquez hi chesual deuh mah se beidawng loin a intlansiak chhunzawm leh a, a tawpah chuan 13-na dinhmun a luah leh hram a ni. French Grand Prix-ah hian rider pariat ngawt an tlan tluan thei lo.

Tun season MotoGP intlansiak panga awm tawh aṭangin Spanish rider Lorenzo hian point 90 hmuin hmahruaitu a ni ta a, pahnihnaah point 85 hmutu Marquez awmin pathumna chu Rossi niin point 78 a hmu ve tawh bawk.

French Grand Prix Results

1 Jorge Lorenzo Spain Yamaha

2 Valentino Rossi Italy Yamaha

3 Maverick Vinales Spain Suzuki

4 Dani Pedrosa Spain Honda

5 Pol Espargaro Spain Yamaha

6 Aleix Espargaro Spain Suzuki

7 Danilo Petrucci Italy Ducati

8 Hector Barbera Spain Ducati

9 Alvaro Bautista Spain Aprilia

10 Stefan Bradl Germany Aprilia