Serie A Roma tana match 600 khel thei Totti
Francesco Totti chuan Italian Club ṭha AS Roma tan Serie A match 600 a khel tling ta. Pathianni zan khan Roma hian an mikhual Chievo 3-0 in an sawp a, inkhel dangah season tawp ruala chawl tur Luca Toni chuan a match hnuhnung berah goal khungin Verona chu a club hlui leh champion Juventus lakah hnehna a chanpui.
Roma-in tun season-a an khelmuala league match hnu-hnung ber an khelh zan hian 'Prince of Rome' ti hiala hming lem an lo vuah sak tawh Totti hian minute 59-naah Mohamed Salah rawn thlakin bench aṭangin a rawn tlan lut a, amah chawimawi nan Olimpico-a mipui 60,000 zet pungkhawm mipui an lo ding hial!
Radja Nainggolan leh Antonio Rudiger te goal khung hnua lo lut Totti hian Miralem Pjanic goal khung tur a siamsak nghe nghe. Kum 39-a upa Totti hmalam hun erawh a la chiang thei lo chhunzawm zel.
Roma tan mel lung pawi-mawh phuntu Totti hian Serie A khelh tam lamah Inter Milan defender Javier Zanetti (615) leh AC Milan legend Paolo Maldini (647) te chiah tluk loh a nei tawh.
Chul thei lo Toni
Pathianni zan inkhel dang-ah champion chiang tawh Juventus-in a zawna league match 10 chhung hnehna an chan zawn tawh chu tih tawp in a awm a, a titawptu chu tu dang ni loin Luca Toni a ni.
Kum 38-a upa Toni hian minute 43-naah penalty aṭangin tun season-a a league goal rukna a khung a, Federico Viviani chuan khung belhin Juve goal neih chhun hi hun tawp dawna Paulo Dybala khung a ni thung.
Season hmasa khan Toni hian Serie A-ah goal 22 khungin Inter Milan striker Mauro Icardi nen an khung tam ber. A kum tam tawh mah se goal a la khung theih em avanga tun season thlenga football la kheltu chuan, "Kum li liam ta vel aṭang khan inkhelh chawlhsan ka rilruk tawh a, mahse goal ka khung zel avangin ka chawl lawk lo a ni," tiin kum tam tak thlenga a inkhelh chhan a chawlh zanah a sawi.
Napoli tan Higuain bawk
Gonzalo Higuain goal khung hmangin Napoli chuan Torino lakah 2-1 in hnehna an chang a, point 79 hmuin Serie A table-ah pahnihna dinhmun an luah.
Argentina internatinoal Hi-guain hian minute 12-naah tun season-a a league goal 33 na khungin Jose Callejon chuan goal khat a thawh ve bawk.
Serie A-ah Juventus cham-pion chiang tawh mah se Napoli leh Roma te hian pahnihna din-hmun an la inchuh a, an inthlauhna chu point hnih niin match khat khelh hmabak an la nei.
League table-a pakhatna leh pahnihnate hian Champions League an khel dawn chiang a, pathumna hian playoff khelh a ngaih dawn avangin team pahnih tan inthlahdah a la thiang lo.