Dutch league champion PSV

Netherlands-a football league inelna sang ber Eredivisie-ah match hnuhnung ber khelh ni thlengin champion tur a la chiang lo a, Pathianni zan khan PSV EindhovenPSV Eindhoven chuan PEC Zwolle 3-1 a hnehin a vawi 23 nan league title an la.

An match hnuhnung ber an khelh hmain PSV leh Ajax te chuan point 81 ve ve an hmu a, Ajax hi goal difference-ah goal ruka an san zawk avangin an dinhmun a ṭha zawka ngaih a ni.

Amaherawhchu, an match hnuhnung berah Amsterdam club hian table mawng ber dawta awm De Graafschap chu 1-1 in an inhnehtawk pui a, inkhel dangah PSV an lo chak thung.

PSV tan hian captain Luuk De Jong chuan Zwolle lakah hian goal hnih a khung a, 2002-03 season a Chelsea striker hlui Mateja Kezman-a'n season khata goal 25 a khung tlin hnuah hetiang dinhmun thleng leh thei hmasa ber a ni nghe nghe.

Season hmasa khan PSV hian Ajax lakah point 17 zeta sang falin league title an chawi a, kuminah erawh March thla khan Ajax hi an hneh lo a, an intiat tawk hle.

Mahse, PSV hian an league match hnuhnung parukah hnehna chang fai vekin an title an humhim. Hetih lai hian Frank de Boer-a enkawl Ajax hian an league match hnuhnung pariatah
ṭum thum ngawt an khingpuite an inhnehtawk pui thung.

PSV Eindhoven coach Phillip Cocu chuan, "Kei chuan thil hi a thim zawngin ka thlir ngai lo a, a eng zawng hlirin ka thir fo ṭhin. Champion ni thei tura kan beiseina neih kha a chau hle a, mahse thil te takte pawh beidawng loa kan chhawm nun chuan a tawpah a hlawhtlinna kan hmu fo. De Graaf-schap khan kan tan hna ropui tak an lo thawk a, an chungah kan lawm hle," tiin Ajax point thum hmuh tur lo chhuhsak ṭhentu De Graafschap chungah a lawm.