Dhawan ropui zanah Hyderabad chak

Pathianni zan Indian Premier League inkhelah Shikhar Dhawan-a'n a theihna pholangin Mumbai Indians lakah Sunrisers Hyderabad chu run 85-in hnehna a chanpui.

Hyderabad hian over 20-ah run 177 hlap chhuakin mi pathum chiah an hloh a, Dhawan hian ball 57 a hmachhawna run 82 siamin a tawp thleng a dam a, a che ṭha hle. Sunrisers tan run 48 siamtu David Warner leh run 39 siamtu Yuvraj Singh-te an khel ṭha bawk.

Mumbai Indians-in chak ngei tum mah se run 21 siamtu Harbhajan Singh aia run siam hnem thei an awm loh avangin an mikhualna ramah an mualpho a, over 16.3-ah run 92 chiah tlinin an vaiin an out vek a ni.

Hyderabad bowler zingah Ashish Nehra chu Mumbai Indians batsman-te tan mangchhia a ni a, over 3-a vawmah run 15 lek pein wicket thum a la thei.

Inkhel hnuhnung zawkah Kolkata Knight Riders-in hmahruaitu nih zelna hun ṭha an neih an chhawr
ṭangkai thei lo a, Gujarat Lions hmaah wicket ngain an tlawm.

Eden Gardens, Kolkata-a in-khel--ah bat hmasa zawk Kolkata-in over 20 chhungin run 158 an siam a, mi pali chiah an hloh. Bat
ṭan tir lamah Kolkata hi bat ṭha lutuk lo mah se an mualpho zualpui tur khuh nan a tawp lamah Shakib Al Hasan (66 runs, not out) leh Yusuf Pathan (63 runs, not out)-te an che ṭha thawkhat hle.

Mahse, Gujarat-in tlaikhawhnua chet ṭhat in awmzia a neih thui lohzia khelmual chhungah an lantir leh a, over 18 chhunga run 164 siama an target umphain mi panga chiah an hloh. Lions tan ball 29 a hmachhawna run 51 siamtu Dinesh Karthik chu batsman zinga che ṭha ber a ni.

Zanin Indian Premier League-ah inkhel pakhat chauh a awm dawn a, dar 8:00-ah Kings XI Punjab chuan Royal Challengers Bangalore an hmachhawn ang.