Fed Cup Semifinal Leg 1 Mizo champion Vs Goan champion

Aizawl FC-in Federation Cup leh I League champion lai Benga-luru FC an hneh hnuah vawiin tlai dar 3:00 hian RG Stadium, Mualpuiah Sporting Clube de Goa an hmachhawn dawn

MPL champion hian Goan champion hi January thla khan an hneh lo a, Mizo club tan Fed Cup final kalkawng hi a awlsam lo.

May 15 hian Fatorda Stadium-ah Aizawl FC leh Sporting Goa ten second leg an khel dawn a, minute 180 chhunga chak zawk hian May 21 hian Guwahati-ah Mohun Bagan leh Shillong Lajong chak zawk nen final an khel ang.

Mizoram vs Goa

Mizoram chhunga football inelna sang ber MPL-ah Aizawl FC kum zawnin an champion a, Sporting Goa hi Goa Professional League champion lai an ni. I League-ah Flaming Oranje hi Salgoacar aiin an chungnung a, Goan club ṭha ber an ni.

Vawiin tlai inkhel tur hi Mizo-ram club ṭha ber leh Goa club ṭha ber an ni a, thlirna tlang dang aṭang chuan club inelna satliah ni loin Mizoram leh Goa inelnaah a ngaih theih ang.

Semifinal kalkawng

Aizawl FC-in I League pariatna an nih avangin champion Bengaluru FC an hmachhawn a, tla tura ngaih an ni. RG Stadium-ah Bengaluru-in Eugeneson Lyngdoh hmangin hma hruai zet mah se Jahar Das-a enkawl Mizo club-in Alfred Kemah Jaryan leh Joel Sunday hmangin I League champion an barakhaih.

I League best coach Ashley Westwood-a'n inkhelh banah 100% a an thawh leh tur thu a sawi a, English coach vau vangin Aizawl FC an zam lo.

Mizo tlangvalin Ben-galuru FC chu an mual Sree Kanteerava Stadium-ah an luh--chhuah a, Nigerian striker Sun^-day-a goal hnih leh captain David Lalrinmuana freekick mawi tak hmangin 3-2 in an hneh nawn sak.

I League palina Sporting Goa-in an hnuai chiaha awm Mumbai FC an hmachhawn a, khualmualah hun tawp dawna Sumit Passi goal hmanga hnehna an chan hnuin Fatorda Stadium-ah Subashish Bose hmangin goal khat bawkin an hneh. Sporting Goa tlarhnung a phui ṭha tih a lang a, Aizawl FC striker Sunday te hmabak a awlsam dawn lo.

Odafa leh Theobald tel lohna

Sporting Goa-in Aizawl an rawn zin hmasak ṭumin Nicholas Fernandes leh Loveday Enyinnaya te goal hmangin hnehna an chang a, goal an chhuah lo. Mateus Costa hote hian match ruk chhung chu hneh loh an tawng tawh lo a, amaherawhchu tun ṭumah hian midfielder ṭha Densil Theobald a inhliam bakah Odafa Okolie an kawl tawh lo bawk.

Aizawl FC coach Jahar Das chuan, "Odafa Okolie hi India rama foreign striker awm tawh zingah chuan a ṭha ber pawl a ni. Federation Cup-a Nigerian striker tel lo hi kan tan chuan lawmna a ni a, Sporting Goa tan chuan channa a ni," tiin Odafa awm loh vangin a lawm tih a sawi.

Goa Pro League top scorer Odafa hi khup hliam vangin zai a tawk a, veteran striker aia an dah luh chu kum 18-a upa Ndidi Chukuwama a ni. Goan league-ah Ndidi hi a inlan tawh a, India ram pum huap chuan sulhnu ṭha a la nei lo.

Sporting Goa tana chanchin lawmawm lo chu Theobald inhliam hi a ni. Trinidadian midfielder hi season liam taa Royal Wahingdoh pathumna nihpuitu kha a ni a, Mualpuia Sporting Goa chak ṭumin player pawimawh a ni bawk.

Theobald hian 2006 FIFA World Cup-ah Trinidad and Tobago tan match thum a khel a, Manchester United player ropui Dwight Yorke leh Dennis Lawrence te'n ram tana inkhelh an chawlhsan hnuah captain armband a hreng pha hial. Ram tana vawi 92 khel thei a nih miau avangin Theobald tel lo tur hi chânna a ni.

Sporting an ṭha

Goan club hian player ṭha pahnih chhawr thei lo mah se zuam chi an la ni lo, Syrian midfielder Mahmoud Amnah an neih bakah 2014 Federation Cup finalist an ni.

Keeper Arindam Bhattacharya
ṭhatzia Mizo mipuiin an hmu tawh a, Subasish Bose leh Loveday te defence laiah an khawng ṭha a, wing back-ah Fulganco Cardozo leh Clemente Joseph te an rintlak bawk.

Midfielder Pratesh Shirodkar leh Rowllin Borges te hian talent an nei ṭha a, Mualpuia an zin hmasak
ṭumin Mizo midfielder-te'n an chelh lo. Tun ṭuma ven uluk tur erawh goal rang tak khungtu Nicholas Fernandes leh Passi te an ni ang.

Sporting Goa coach Mateus Costa chuan, "Bengaluru FC aiin Aizawl FC kan tum châk chuang lo. Aizawl FC hi team ṭha tak an ni a, hneh tur chuan fimkhur viau a ṭul ang," tiin Mizo club a fak a, final erawh an thlen theih ngei a beisei thung.

Aizawl FC lam

Aizawl FC tlar hnungah Lalruat-thara a ṭangkai a, amaherawhchu Hmunhmelṭha tlangval hi hrem vangin a inlan thei dawn lo.

Ruatthara aiah Armed Veng tlangval Lalram-chullova chu inlan leh tura ngaih a ni a, tlarhnungah Lal-chhawnkima, Emma Chigozie leh Ricky Lallawmawma te an awm ang. Chullova hi a tel lohna inkhelah a club an chet ṭhat fo avangin a khel dawn a nih chuan game discipline
ṭha tak nen a khelh a ṭul ang.

Federation Cup bikah Soram Poirei a cheṭha. Tlarhma lamah Joel Sunday chu goal khung khawl a ni ber a, a thlawptu Alfred Kemah Jaryan-a'n a thlawp ṭha bawk. Midfield laia Yuta Kinowaki leh captain Papuia (David) an ṭangkai.

Wing lamah Alfred Zohming-mawia leh Brandon VL Remdika te'n bul an ṭan a rinawm a, rawlthar duhawm Lalramzauva a inlan a nih pawhin a mak lo ang.

Aizawl FC coach Jahar Das chuan, "I League aṭangin inzir tur kan ngah tawh hle. DSK kan hneh zawhah Sporting Goa kan hneh lo a, Mohun Bagan kan hneh zawhah Shillong Lajong kan hneh lo leh bawk. Kan tihsual aṭangin kan inzir tawh dawn a, Sporting Goa lakah hian chet sual kan tum lo," tiin result ṭha a beisei thu a sawi.