City chetsual vangin United an lawm

Season ṭantirha Premier League champion tura rinkai Manchester City, Arsenal leh Manchester United te season tawpah Champions League khelh chuhin an inum.

Pathianni zan khan Arsenal-in an hmelma Manchester United tan kawng sial sakin Etihad Stadium-ah Manchester City nen 2-2 in an inhnehtawk a. Gunners tan Cham--pions League khel turin table mawngphaha awm Aston Villa laka point khat hmuh a tawk a, United tan West Ham leh AFC Bourne-mouth hneh ve ve a ṭul a, City erawh club dang result-ah an innghat thung.

Goal 4

Manuel Pellegrini hoten Ser-gio Aguero goal mawi tak hmangin minute 8-na leka hma an hruaina chu minute hnih hnuah Arsenal-in Olivier Giroud tauh luh hmangin an sut.

Second half minute 51-naah Kevin de Bruyne-a'n mimal ropuina lantirin goal class tak a khung a, Arsenal-in team goal ropui phochhuak thungin minute 68-naah Alexis Sanchez hmangin an siphurh an sut.

City hmalam

Chak mamawh City-in attac-king game ṭha tak an khel a, point thum an hlawhchhuah loh chhanah tlarhnung mawhpuh theih a ni. Goal khatna an chhuah hma hian Joe Hart leh Gael Clichy te an inring thul a, corner an chawi. French forward Giroud-a'n a tauh lut a, defender manto Eliaquim Mangala-a'n a tihtur a ti lo.

City goal hnihna chhuah chhan erawh Arsenal thiam vang a ni a, minute 90 thlir erawh chuan City tlarhnung hian nghet ṭhat lai an nei lo a ni ber. Chilean manager Manuel Pellegrini-a'n Etihad Stadium-a City a enkawl hnuhnun berna inkhel result-ah club thuneitu an lawm lo tih chu hun tawp ham rik ruala club chairman Khaldoon Al Mubarak chet danin a sawifiah chiang hle.

Manuel Pellegrini hian season thum chhunga Premier League nomawi vawi khat chiah a chawi avangin a hlawhchham niin an sawi zui thei a, chutihrualin Champions League semifinal thlenpuitu coach a nih avangin Chilean manager an thlir dan hi a dang thei bawk.

Tun season-a City chetchhiat chhanah erawh club hotuten mawh an phur tel bawk. February 1 khan City-in season thar atana Pep Guardiola an lakluh thu an puang a, hemi hnu hian league match vawi 14-ah vawi ruk chiah an chak.

Gunners beiseina

Tottenham-in White Hart Lane-ah Son Heung-min hmang-in hma hruai zet mah se Southampton-in Steven Davis goal hnih hmangin hnehna an chang. Spurs-in Premier League title an ban phak loa a awm hnuah an chetṭhat an chhunzawm thei lo a, midfielder hrem tawk Dele Alli tel loin an chak thei lo.

Mauricio Pochettino hote hi an chak loh avangin an hmelma Arsenal-in an la umphak thei a, beisei loh hnuah Gunners ṭantuten St Totteringham's Day hman theihna hun ṭha an nei. Arsenal ṭantute hian season tinin Spurs chunga an awm chian veleh St Totteringham's Day an hmang
ṭhin a, Gunners chunga Tottenham awm hnuhnung ber chu 1994-95 season daih tawh kha a ni.

Engtin zel?

Premier League-in Cham-pions League-ah quota pali an nei a, UCL champion leh Europa League champion-in Europe inelna sang ber hi an khel thei bawk. Amaherawhchu Europe inelna sang berah hian ram khat tan panga bak a tel theih loh.

Champion Leicester City leh Tottenham Hotsphurs ten Cham-pions League an khel chiang tawh a, Arsenal, Manchester United leh City ten hmunruak pahnih an inchuh mek. Liverpool-in Europa League an champion chuan UCL an khel bawk ang.

Manchester City khan Real Madrid hnehin UCL-ah champion se, Liverpool-in Europa League champion bawk se chuan Premier League kaltlangin club pathum chiahin an khel thei dawn tihna a ni a, amaherawhchu Manuel Pel-legrini hote an chetsual chhoh takah chuan Louis van Gaal-a hoten beisei an nei chhunzawm ve zel.

Eng nge an sawi?

Manchester City manager Ma-nuel Pellegrini chuan, "Ṭantirh minute 25 chhung kha chu kan khelṭha takzet a, chak thei kan ni a, kan phu tel bawk. Kan tumruhna te, kan rilru puthmang te leh kan che vel a dik a, team ṭha kan tum avangin kan duh ang point kan hlawh chhuak lo a ni," tiin a sawi.

Arsenal manager Arsene Wenger chuan, "Lungawi lohna tur awmin ka hre lo. Vawi hnih si phurh zawkah kan ṭang a, a suttu zawk kan ni. Inkhelh ṭantirha City game rang lutuk khan min barakhaih a, khatianga attack na kan dawl zo kha ka player-te ka fak hle a ni," tiin inkhel result-a a lungawi thu a sawi.