ISL transfer bazar a lun

European football transfer bazar a zo a, Indian football a league sang ber Indian Super League lamah erawh transfer bazar kalpui chhunzawm zel a la ni. 

Asian football-ah Chinese Super League leh ISL ten European football thlengin ngaihven an hlawh chho a, Indian football club-te bazar-na pawh Africa aṭangin Europe lamah a insawn mek. 

ISL-ah sum a tam miau avangin European football aia Indian football khelh thlang zawk pawh an awm ta nual a, Asia lama league ngaihven hlawh ber pawl A League player-te pawhin India lam hawiin an mit an len ṭan. 

Manchester City meuh pawh Mumbai City neitu zingah an tel ta a, ISL hi a tenau lo tih a lang - November 2020 aṭanga khelh ṭan tur inelna atan club-te pawh an inpuahchah nasa hle. 

Kerala Blasters-in season hmasaa beisei an phak loh hnuah I League a Mohun Bagan champion puitu Kibu Vicuna lam an hawi a, Spanish manager hoin ISL champion nih an beisei ang. 

Blasters hian bazar-na tur sum pawh Vicuna hnenah an pe a, ram pawn player lakluh theih pasarih zingah panga an lalut tawh a, October a an lakluh Gary Hooper leh  Costa Nhamoinesu hi an nep lo. 

Tottenham Hotspur academy a awm ṭhin Hooper hi kum 32 mi a ni a, kum khat atan contract a ziak. Norwich City tan Premier League pawh a lo khel tawh a, a career a a season duhawm ber tia chhal ngam chu 2012-13 khan Celtic tan a hmang - inelna hrang hrangah match 51 khelin goal 31 a khung thei!

Celtic tana a khelh lai hian Scottish Premier League nomawi vawi hnih a chawi a, PFA Scotland Team of the Year-ah vawi hnih langin 2011-12 khan top scorer a ni - season hmasa khan A League club Wellington Phoenix tan a khel.

Blasters lam hian niminah chanchinthar an nei a, he thu buatsaih lai hian official takin puangzar lem lo mah se Costa Nhamoinesu chu an lalut niin phai lam media te chuan an tarlang. 

Zimbabwe centre back hian 2013 aṭang khan Czech First League club Sparta Prague tan a lo khel tawh a, season hmasa thleng khan European football a club langsar ni phak Prague tan hian a la khel. 

Kum 34 mi defender hi ram tan vawi 11 a inlan tawh a, Czech lama a pem hma hian Polish club Zaglebie Lubin tan pawha lo khel tawhin tawnhriat a nei ṭha hle. 

K. Lalṭhathanga chu a khel dawn bawk a, NorthEast United aṭangin South India lam hawiin a puanthuah a tel. Puitea bakah hian Lalruatthara chu Blasters a Mizo awm sa a ni. 

NorthEast United-in Dylan Fox chu season khat chhung an hnena khel turin contract an ziahpui a, season hmasaa Central Coast Mariners tana A League khel a nih avangin defender ṭha a ni tih a chiang - kum 26 mi chauh a la ni. 

Highlanders hian ram pawn player pasarih neih theihah panga an lalut tawh a, Fox hma hian Mauritania international Khassa Camara, Portuguese forward Luís Machado leh Belgian defensive midfielder Benjamin Lambot an lalut tawh a, Uruguayan midfielder Federico Gallego an nei sa bawk. 

Guwahati club hian Mizo player zingah Lalengmawia leh Alfred Lalruotsang an nei sa a, Mizo forward Lalkhawpuimawia, Rochharzela ldeh Jonathan Lalrawngbawla te chu season thar atan an lalut bawk - an naupang ṭhe ṭhaw hle. 

NorthEast United ram pawn player zingah pawh kum 33 mi Lambot tih loh chu kum 30 aia upa dang an awm rih lo a, coach thar Gerard Nus hoin team naupang tak din an tum niin a lang. 

Manchester City neitu City Football Group-in Mumbai City a 65% an lei hnuah Mumbai club hian ngaihven a hlawh lehzual a, an striker lak thar Adam le Fondre pawh a zahpuiawm loh hle. 

Kum 33 mi striker hian season hmasa khan A League club Sydney FC tan a la khel a, league match 20-ah goal 17 ngawt a la khung thei - English championship division lamah a hun tam zawk a hmang a, Premier League-ah season khat a lo khel tawh bawk. 

Reading tan 2012-13 khan Premier League hi a khel a, league match 34-ah goal 12 a khung thei - January 2013-ah phei chuan Premier League Player of the Month a ni hial a, A League Team of the Season-ah season hnih a khelh chhungin a lang phak ve ve. 

Mumbai City hian Japanese midfielder Cy Goddard chu Serie A club Benevento Calcio aṭangin season khat chhung atan loan-in an hawh bawk a, kum 23 mi midfielder hi Tottenham Hotspur academy chhuak a ni. 

Season hmasaa Churchill Brothers tana khel Glan Martins chuan ATK Mohun Bagan a zawm thu puan a ni a, kum 26 mi Goan midfielder hian Kolkata club a hmun pawimawh chang nghal tur erawh chuan a thawhrim ve deuh a ngai ang. 

Mohun Bagan hian Indian defender sawi hlawh Sandesh Jhingan an lalut bawk a, season hmasa lama hliam vanga inlan lo defender hian kum nga chhung atan contract a ziak. 

Kolkata club hian ram pawn player lakluh theih pasarih an nei kim tawh a, season hmasa lama an player neih sa aṭangin striker inkawp fuh Roy Krishna leh David Williams, midfielder Edu García, defender Carl McHugh leh attacking midfielder Javi Hernández an chelh thei. 

Anni bakah hian 2015 leh 2016 a ATK tana lo khel tawh, tun hnai season hnih chhung Jamshedpur FC tana khel defender Tiri leh Australian midfielder Brad Inman an lalut a, Inman hian season hmasa khan A League club Brisbane Roar FC tan a khel.